Sustegnair las unfrendas da maldiever en la Baselgia catolica stoppia esser pli impurtant ch'ils quitads pervi dal renum da la baselgia. Da quest avis è la conferenza centrala roman-catolica, l'uniun tetgala da las baselgias chantunalas. Tenor ella dettia dubis giustifitgads, schebain er ils uvestgs vesian quai uschia.
Che l'uvestg da Cuira, Joseph Maria Bonnemain stoppia uss investigar encunter ses collegas d'uffizi saja ina constellaziun problematica. La conferenza centrala pretenda che per elavurar abus sexual stoppian exnum persunas dal fatg externas collavurar.
I dovria ina persuna cumpetenta en investigaziuns penalas
Er la presidenta d'ina organisaziun da victimas d'abus ha gia prendì posiziun en chaussa en la gasetta «Arcinfo». I saja in sbagl da fidar ad in uvestg d'intercurir encunter ses collegas d'uffizi.
L'uniun tetgala da las baselgias chantunalas pretenda plinavant in post d'annunziar abus ordaifer da las structuras ecclesiasticas. E collavuraturs e collavuraturas da la baselgia duain da nov er dastgar esser spartids, u maridads ina ulteriura giada u esser omosexuals u viver en in concubinat. Davos quels scumonds saja ina morala da sexualitad problematica che saja part d'in sistem ch'haja chaschunà ils abus.
