Sch’in manischunz da camiuns va memia spert cun sia moto privata èsi pussaivel ozendi ch’el perda ses permiss, era quel per charrar cun il camiun.
Il Parlament federal vul uss midar quest «chasti dubel» dentant mo en cas levs. Suenter il Cussegl naziunal ha era il Cussegl dals chantuns approvà ina tala moziun.
Fin uss vala: Tgi che ha plirs permiss da charrar e perda in da quests, quel perda tuts. La cumissiun da traffic dal Cussegl dals chantuns è da l'opiniun che manischunzas e manischunzs da professiun sajan tut tenor spert periclitads en lur existenza. Ella pretenda perquai dapli flexibilitad tar levs surpassaments da la lescha.
Finamira è da differenziar tar manischunzs da professiun tranter surpassaments privats e tals che succedan durant la lavur.
RTR novitads 12:00