Sco quai che SRF scriva, saja la dumonda suenter il vaccin da corona per uffants en l'entira Svizra – e cunzunt en la Svizra occidentala – plitost pintschna. Era en il Grischun èn fin ussa 637 uffants vegnids vaccinads. Quai en circa 5% da la populaziun tranter 5 ed 11 onns.
Uffants n'èn betg uschè periclitads
Ils motivs daco che blers geniturs desistian da la virola saja perquai ch'ils uffants na sajan quasi betg periclitads dal coronavirus, di la media chantunala Marina Jamnicki. Plinavant hajan blers uffants e giuvenils era gia gì corona e na stoppian uschia betg sa laschar vaccinar – quai di era la recumandaziun uffiziala da l'Uffizi federal da sanadad.
Effects secundars pli darar
Ils effects secundars da la virola – per exempel fevra, mal il chau u mal il bratsch – sa mussian pli darar e pli lev tar uffants che tar persunas creschidas. Effects secundars pli grevs sco per exempel in'inflammaziun dal muscul dal cor vegnia avant pli darar tar uffants che tar creschids, di la media chantunala.
Ulteriuras 500 annunzias
Il chantun Grischun na fetschia betg activ reclama per il vaccin da corona per uffants ed els na hajan nagin dumber d'uffants ch'els veglian vaccinar. Tuttina spetgian anc radund 500 ulteriurs uffants sin la squitta. Damai ch'i vegnia – almain en ils centers da vaccinaziun – be vaccinà la sonda e mintgatant anc la mesemna suentermezdi, stoppian ils geniturs per part spetgar pliras emnas sin in termin.
30'000 en l'entira Svizra
En Svizra èn fin qua radund 30'000 uffants tranter 5 ed 11 onns vegnids vaccinads cunter Covid-19. Quai correspundia ad ina quota da 5%, sco ina retschertga da SRF mussa.
La pli bassa è la quota en ils chantuns da la Svizra franzosa. Là munta ella dapertut a sut 2%. Il pli aut è ella en ils dus chantuns da Basilea cun passa 10%. En ils chantuns ils pli populads èn ils uffizis da sanadad cuntents cun la dumonda da vaccinar. En il chantun Turitg han survegnì fin ussa passa 8'000 uffants la vaccinaziun cunter corona ed a Berna radund 5'000. Cunzunt a l’entschatta da la campagna era la dumonda stada gronda.
Betg surstà da la dumonda bassa
Ils geniturs che vulevan laschar vaccinar lur uffants uschè spert sco pussaivel eran gia vegnids l'emprima fin d'emna, cura che la Confederaziun aveva recumandà il vaccin per uffants tranter 5 ed 11 onns. Entant sa reparta la dumonda gia puspè.
Che la quota da vaccinaziun resta per il mument bler pli bassa che tar ils creschids na saja nagina surpraisa. Sche la malsogna sa sviluppescha tar uffants resta il decurs da l'infecziun per regla relativamain moderà.
