251 cas da FSME - Zeccas sa derasan vinavant en Svizra
Fin la fin da l'october èn 251 cas da meningoenzephalitis (FSME) vegnids annunziads. Tenor l'Uffizi federal da sanadad publica è quai il terz grond dumber dapi l'onn 2000.
Dapi l'onn 2000 sajan vegnids annunziads durant il medem temp mintgamai tranter 52 e 356 cas, scriva l'Uffizi federal da sanadad publica. Ils pli blers cas haja dà l'onn 2018, ils segund blers il 2017. Vinavant constatescha l'uffizi ch'i dat da mais tar mais ina gronda fluctuaziun.
Legenda:
Il 2019 hai dà il terz blers cas da FSME dapi l'onn 2000.
Keystone
Pervi da morsas da zeccas sajan 18'000 persunas idas tar il medi. Quest dumber correspundia a la media da plirs onns, scriva l'Uffizi federal da sanadad publica. 9'300 cas acuts da borreliosa sajan vegnids annunziads.
Sistem d'annunzia «Sentinella»
Avrir la boxSerrar la box
Pervi dals numerus cas da morsas da zeccas vegnan quellas registradas. I sa tracta d'ina rait da medis da chasa, ch'annunzian a «Sentinella» voluntarmain quants pazients ch'els han gì en quest connex. Sin basa da quests resultats pon ins calcular approximativamain il dumber da cas en tut la Svizra. Quai ha l'Uffizi federal da sanadad publica fatg.
Ord l'archiv
Tschertas zeccas èn infectadas cun ina bacteria che chaschuna borreliosa, autras cun in virus che chaschuna la malsogna FSME, in'inflammaziun dal tscharvè. Encunter il virus datti ina vaccinaziun. Dapi il 2019 cusseglia l'Uffizi federal da sanadad publica quella vaccinaziun quasi en l'entira Svizra – er en il Grischun.
