Il quartier Cuira Vest sa sviluppescha cuntinuadamain – bainbaud nescha en il vest da la chapitala grischuna in nov center urban. Per tegnair quint a quest svilup e per garantir la mobilitad, prendan la citad da Cuira e la Viafier retica a mauns in project a lunga vista: Ina nova staziun moderna duai remplazzar la fermada dal tren actuala. L'onn 2026 è planisada l'avertura.
La fermada Cuira Vest exista dapi 20 onns e na correspunda betg pli als basegns d'ozendi, ha il directur da la Viafier retica Renato Fasciati accentuà a la preschentaziun dal project. En l'avegnir duai la staziun esser in center da traffic per la viafier, bus, auto da posta, peduns e velocipedists. Quai munta era che l'areal è accessibel per persunas cun impediments.
Project da 60 milliuns francs
En total custa la nova staziun a Cuira Vest bun 60 milliuns francs. La citad da Cuira quinta cun ina cumpart da 20 milliuns vi da questas investiziuns. Entras differentas contribuziuns possian ins dentant quintar la finala cun custs da bun 10 milliuns ord la cassa da Cuira, uschia la suprastanta responsabla Sandra Maissen.
Sco proxim decida il parlament da Cuira davart il project e la fin da settember la populaziun da Cuira. Sche tut va tenor plan vegn la nova staziun a Cuira Vest averta la stad 2026.