Dals 26 chantuns din 24 ditg Gea. Sulettamain ils chantuns Appenzell Dadens (55,8%) e Sviz (51,4%) din Na. Il chantun Appenzell Dadora di Gea a la lescha da Covid-19, dentant mo cun 50,7% da las vuschs.
Il pli grond sustegn ha la lescha survegnì en ils chantuns Basilea-Citad (70,6%), Turitg (66,2%) e Tessin (65,3%) da las vuschs.
Cler resultat er en il Grischun – 60,9% Na
Il chantun Grischun di cleramain Gea a la lescha da Covid-19 cun 60,9%. Quai mussan ils resultats da la chanzlia chantunala. 93'112 cedels da votar èn vegnì inoltrads, quai munta ad ina partizipaziun da 65,9%.
En il Grischun han surtut las vischnancas dal Partenz refusà la lescha, uschia ha per exempel Luzein ditg Na cun 64,5%. Il pli cler Na da l'entir chantun hai dà a Runtgaglia, quai cun 66,7% da las vuschs. Il pli ferm sustegn ha la lescha survegnì en la vischnanca dad Urmagn, cun 75,5% Gea e Tujetsch cun 75%.
Grischun: Lescha da Covid-19
Resultat 13:09
La regenza Grischuna è cuntenta che la Lescha da Covid-19 è vegnida acceptada. Quai ha ditg il cusseglier guvernativ Marcus Caduff, envers RTR. Il resultat cler saja in segn che la populaziun fidia a las decisiuns da la regenza. Sper la fidanza saja quai resultat er ina conferma per la lavur che la regenza ha fatg il davos onn e mez.
Vinavant dettian quels 60,9% era ina segirezza per l'enviern. Uschia sappia la regenza che la populaziun stettia davos ella e las mesiras che stoppian tut tenor anc vegnir prendidas.
Jan Koch, il vicepresident da la PPS grischuna è trumpà dal resultat, ma n'è betg surstà. Ussa stoppian ins mirar vinavant ed els vegnian a sa dustar cunter mesiras supplementaras pli rigurusas. Oravant tut cunter ina pussaivla regla da 2G. La schliaziun saja in ulteriur schlargiament da la capacitad da testar e da vinavant avair tests gratuits.
Lescha da Covid-19
Igl è la segunda votaziun davart la lescha da Covid-19: Ils 13 da zercladur ha il suveran gia acceptà quella cun 60% da las vuschs. Uss hai danovamain dà in referendum – quella giada cunter las adattaziuns ch’il parlament ha fatg il mars 2021 en la lescha. Sper agids finanzials ed il contact tracing stat surtut l’introducziun dal certificat da Covid-19 en il focus.
