Actualmain dettia en Grischun 55 lufs identifitgads – sis trieps ed intgins animals singuls. Uschia ha infurmà Arno Puorger da l'Uffizi da chatscha e pestga. Ils chaus d'alp e lur muntaneras sajan vinavant sut squitsch.
Las pussibilitads d'intervegnir sajan limitadas. Che la surveglianza da chatscha nizzegia dapli la clausula generala da la lescha da polizia – quella permetta da sajettar lufs senza lubientscha da l'Uffizi federal d'ambient – na saja betg realistic. Quai saja stà ina situaziun extraordinaria tar in singul animal.
Observaziun cun dronas e GPS
Durant la dieta era er la digitalisaziun in tema. Er l'agricultura vegn adina pli digitala. Concret èn vegnids preschentadas las pussaivladads da nizzegiar dronas – per exempel per observar ina muntanera u per controllar sch'in bigl porta anc aua.
In auter med tecnic ch’è vegnì preschentà è l’uschenumnà «Alptracker». Quel apparat trametta via GPS signals directamain tar il pur. Uschia pon ins tegnair en egl ils animals. Surtut en dis cun tschera saja quai in avantatg. Per controlla da sanadad tar animals n'èn dentant tuttas duas opziuns tecnicas betg adattadas.