In comité enturn ils «Amis da la constituziun» ha danovamain fatg in referendum cunter la lescha da Covid-19. Quella giada cunter las adattaziuns ch’il parlament federal ha fatg il mars 2021. Perquai decida il suveran svizzer danovamain a l'urna.
Tant il Cussegl federal sco era il parlament federal proponan d'acceptar la lescha.
Il comité da referendum perencunter è da l’avis ch’i na dovra nagina revisiun da lescha da Covid-19. Quella saja nunnecessaria ed extrema. Las leschas existentas tanschian per proteger la populaziun svizra da Covid-19 u dad autras malsognas. En la critica è surtut era l’introducziun dal certificat da Covid-19.
Tge capita tar in Na?
Enfin ils 19 da mars 2022 na sa mida nagut, enfin lura resta la lescha da Covid-19 èn vigur sco la constituziun prevesa. Silsuenter perdan las midadas da la lescha dentant lur vigur, sch'il suveran di Na ils 28 da november. Uschia na dess quai lura per exempel nagina basa legala per ils agids finanzials e per il certificat - era betg per viadis a l'exteriur.
Las posiziuns èn cleras: Da las partidas grondas di sulet la PPS Na - saja sin champ naziunal ubain era chantunal. Interessanta è la posiziun da la PPS tuttina: Per la prima votaziun davart la lescha da Covid-19 il zercladur aveva la PPS Svizra anc dà liber la vusch e la PPS dal Grischun decis da refusar la lescha.
Sin in clic tut las fatschentas federalas e communalas: rtr.ch/votaziuns
