La procedura per eleger derschadras e derschaders federals duai daventar pli gista ed independenta da partidas politicas. Quai pretenda l'iniziativa che va en votaziun ils 28 da november.
Actualmain elegia il parlament federal las derschadras ed ils derschaders federals. Ils iniziants vulan midar quai ed introducir in sistem da trair la sort.
Il sistem actual
Avrir la boxSerrar la box
Mintga sis onns elegia il parlament federal (Cussegl naziunal e Cussegl dals chantuns) las derschadras e derschaders federals. Tradiziunalmain vala in proporz da partidas, quai munta: Partidas fermas han da bun dapli derschadras e derschaders federals. Tar l’elecziun resguarda il parlament plinavant criteris sco p.ex. la schlattaina, la vegliadetgna ubain la derivanza.
L'iniziativa è vegnida inoltrada l'avust 2019 cun 130'000 suttascripziuns valaivlas. Sco bab da l'idea vala l'interprendider e milliardari da Zug, Adrian Gasser.
Cussegl federal e parlament recumondan da refusar l’iniziativa e da cuntinuar cun il sistem actual per eleger derschadras e derschaders federals.
L'iniziativa ha in grev stan en la politica: Tut las partidas grondas da la Svizra – ed er dal Grischun – refusan ella.
Dossier online
Avrir la boxSerrar la box
Sin in clic tut las fatschentas federalas e communalas:
rtr.ch/votaziuns
