Novitads dals 21-07-2024 - Mesolcina: 190 voluntaris han gidà da rumir prada e cultira - Novitads

Il di da solidaritad en il Mesauc ha surpassà las spetgas dals organisaturs. Quai ha communitgà la regiun Moesa. Radund in mais suenter las malauras desastrusas hajan passa 190 voluntaris da la Svizra e da l’Italia nettegià prada e cultira sin 13 plazzals. Quai cun agid da maschinas grondas d’interpresas da la regiun. La vischnanca da Lostallo haja engrazià cun in gentar cuminaivel. Las malauras dals 21 da zercladur han chaschunà auas grondas e bovas. Duas persunas èn mortas, ina ulteriura è anc sparida. La vischnanca da Lostallo stima il donn material a 38 milliuns francs. Damaun a saira infurmescha ella davart il stan actual ed ils proxims pass planisads.

Il dumber da persunas ch’èn vegnidas illegalmain en Svizra è sa reducì marcantamain. Dapi l’entschatta da l’onn hajan las guardias da cunfin arrestà 12’500 migrants illegals. Quai rapporta la «NZZ am Sonntag». Actualmain sajan las cifras mensilas davart l’immigraziun illegala be mez uschè grondas sco ils onns avant. La raschun saja che las rutas da migraziun sajan sa midadas, ha declerà il Secretariat da stadi per la migraziun. Per exempel dettia al cunfin cun l’Austria strusch pli immigraziun illegala.
En Svizra hai gist dà trais accidents mortals en auas da nudar questa fin d'emna. A Turitg è mort in giuven da 15 onns suenter ch'el è siglì la sonda en la Limmat. Sia bara è vegnida chattada la dumengia suenter in'acziun da tschertga pli gronda. En il chantun Zug èn vegnidas salvadas sonda gist duas baras entaifer aifer be duas uras. Tar in implant da far bogn al lai dad Ägeri è sa disgrazià in um ed en il lai da Hünenberg è sa disgraziada ina dunna. Quai rapporta la polizia chantunala da Zug. Omadus sajan vegnids chattads datiers da la riva dals lais. La raschun da la mort n'è en omadus cas anc betg clera.

Il di en survista