Il problem principal per l'avegnir per l'economia en il Grischun è il manco da persunal.
Impressaris e mainafatschentas raquintan da lur sforzs da chattar persunal qualifitgà. «Inserats, quai na fatsch jau daditg betg pli» – quai portia nagut, di Rafael Guldimann che maina a Trun ina fatschenta d'installaziuns sanitaras e stgaudaments. Pervi da la lavur pudess el engrondir sia fatschenta, chattar persunal adattà saja dentant il problem.
Era Mattias Friberg, mainafatschenta da la firma da bajegiar Beer SA a Rabius enconuscha quest problem. Durant la stad occupa la firma 110 collavuraturs e collavuraturas. Guardond sin la demografia e savend co che quai sa sviluppia ils proxims onns, saja quai schon in tema che fetschia quitads.
Sche chattar persunal fiss uschè simpel sco quai ch'ins pensa magari, lura avess jau magari pli ruassaivels dis. Quai dat propi da patratgar.
Che la branscha sezza possia far ina u l'autra midada, da quai è Clau Degonda, impressari a Cumpadials persvas. «Nus pudain mirar che las plazzas restian attractivas, crear models flexibels cun lavur parziala ubain porscher in bun lieu da lavur. Dentant saja era anc da lavurar vid la reputaziun da lavurs manualas. Quella n'è betg anc là nua ch'ella avess dad esser.»
Da l'installatur, sur il scrinari fin tar il minister d'economia
-
Bild 1 von 7Legenda: Rafael Guldimann El maina ina fatschenta d'installaziuns sanitaras e stgaudaments a Trun e di: «Nus avain il plaz, nus avain il material ed er la lavur per pudair engrondir, dentant manca il collavuratur. In u dus avessan patgific anc plaz.» RTR, Eshter Berther -
Bild 2 von 7Legenda: Stefan Lutz El maina ina fatschenta da pictur cun quatter emploiads ed emploiadas. El manegia che las cundiziuns fissan ussa meglras che pli baud: «Ir enturn in cun l'auter sin il bajetg è oz in toc meglier che pli baud, lura eri bler pli brut.» RTR, Esther Berther
-
Bild 3 von 7Legenda: Clau Degonda Mainafatschenta d'ina firma da fanestras a Cumpadials. El vesa er in obligaziun tar las fatschentas: «Las interpresas ston daventar pli flexiblas, porscher plazzas da lavur parzialas ubain pussibilitar dapli vacanzas. Oz è quai in giavisch da la societad.» RTR, Esther Berther
-
Bild 4 von 7Legenda: Mattias Friberg El è in dals impressaris da la firma da construcziun Beer SA a Rabius: «Sche chattar persunal fiss uschè simpel sco quai ch'ins pensa magari, lura avess jau magari pli ruassaivels dis. Quai dat da patratgar.» RTR, Esther Berther
-
Bild 5 von 7Legenda: Marcus Cathomen Dapi 20 onns instruescha el a la scola professiunala ils stagners d'autos, El constatescha che las classas d'emprendistas ed emprendists en sia branscha sajan per part per la mesadad pli pitschnas che anc avant 10 u 12 onns. Tenor el èsi tranter auter impurtant che la scolaziun restia en la regiun. RTR, Esther Berther
-
Bild 6 von 7Legenda: Maurus Blumenthal Per il directur da l'Uniun grischuna d'artisanadi e mastergn è cler: «Il problem principal per l'avegnir per l'economia en il Grischun è il manco da persunal.» RTR, Esther Berther
-
Bild 7 von 7Legenda: Marcus Caduff Il minister d'economia vesa il problem: «La politica è fitg pertscherta che quai è in fitg grond problem, il problem è fitg acut.» RTR, Esther Berther
Era davart da la politica èn ins fitg pertschert che la mancanza da persunal vegnia els proxims onns a fatschentar anc bler pli fitg. Tenor il minister d'economia, Marcus Caduff possia la politica tranter auter guardar per il suandant:
- procurar per canortas, uschia che tut quels che vulan lavurar, possian era far quai
- lura saja la scolaziun en il lieu fitg impurtanta
- e la finala sco terz punct saja da communitgar anc pli fitg ch'il Grischun saja in bun lieu per vegnir a lavurar ed abitar
Il cusseglier guvernativ e minister d'economia di che tar mintga inscunter cun represchentants da l'economia saja questa problematica in tema. Simplas schliaziuns na dettia dentant betg.
Las interpresas ston daventar pli flexiblas, porscher plazzas da lavur parzialas ubain era pussibilitar dapli vacanzas. Oz è quai in giavisch en la societad.
Per tadlar en parts
Maurus Blumenthal, il directur da l'Uniun grischuna d'artisanadi e mastergn è fitg pertschert da la problematica da persunal. Quel manchia en la gronda part da las branschas è daventia adina pli problematic. Per el duai la collavuraziun tranter politica, branschas ed impressaris daventar anc pli stretga. Ins stoppia chattar vias co recrutar lavurants e lavurantas d'ordvart. Senza quels na saja betg pussaivel da far frunt a la mancanza.
Nus avain il plaz, nus avain il material ed era la lavur per pudair engrondir, dentant manca il collavuratur. In u dus avessan patgific anc plaz.