- La regenza grischuna duai laschar sanar la deponia veglia «Rusna da furns» da la Ems-Chemie. Quai pretendan ils Verds cun ina petiziun. Fin uss hajan els gia rimnà passa 1’400 suttascripziuns entaifer in’emna – hai num en ina communicaziun. Il glindesdi vulan ils Verds surdar la petiziun a la regenza. Il chantun aveva decis da betg sanar, mabain da mo survegliar la deponia che pudess esser la raschun da l’aua da baiver contaminada. La fin da mars han la vischnanca da Domat ed il WWF fatg recurs cunter questa decisiun.
- A Cuira èsi vegnì mesirà oz l'emprim di da stad da quest onn. Curt avant mezdi è il termometer creschì sin passa 25 grads. La raschun saja il favugn, sco l'Uffizi federal per meteorologia communitgescha via X. Gia il 2022 eri vegnì mesirà l'emprim di da stad a Cuira. Quai medemamain ils 12 d'avrigl cun passa 25 grads.
- Tar la partenza dad in nov jet dal Cussegl federal en chapitala tirca Ankara hai dà problems tar l'acceleraziun, quai communitgescha l'armada svizra. Il sgol cun il minister da l'exteriur Ignazio Cassis a bord è però tuttina partì ed arrivà senza incidents ad Antalya. La raschun per l'incident vegnia ussa sclerida cun il producent Bombardier. Il Cusseglier federal Ignazio Cassis è tranter auter viagià en Tirchia per in inscunter cun il minister da l'exteriur tirc. Per raschuns da segirezza duai Cassis però returnar en Svizra cun in auter aviun. Il jet dal Cussegl federal è dapi il schaner en acziun.
- Entamez la guerra da commerzi cun la China excludan ils Stadis Unids smartphones e computers dals augments da dazis dispitaivels dal president Donald Trump. Quai resulta dad in document da l'autoritad americana da duana e cunfin ch'è vegnì publitgà. Las excepziuns valan surtut per products electronics che vegnan importads da la China en ils Stadis Unids. Per ulteriurs products chinais valan il mument dazis da 145%.
Il di en survista
Themen in diesem Newsticker
- Hockey: Losanna cunter ZSC Lions en il final dals playoffs
- Laax acceptescha credits da 3,5 milliuns francs
- Ballape regiunal: Schluein Glion e Valposchiavo gudognan
- Via d'Arosa stada serrada in'ura pervi d'accident cun moto
- USA: dazis na valan betg pli per smartphones e computers
- Problems tecnics tar jet dal Cussegl federal
- 25 grads muntan l'emprim di da stad a Cuira
- Val Bavona è puspè averta per turistas e turists
- Influenza da Karin Keller-Suter sin Trump saja speculaziun
- Anouk e Zoé Vergé-Dépré perdan tar lur emprim turnier communabel
