«Zentralwäscherei» Cuira - Nettegiar per l'igiena

La lavandaria Zentralwäscherei a Cuira ha il mument bler da far. Mintga di han las maschinas spezialas da lavar enfin 13 tonnas laschiva. Ils passa 60 collavuraturs e collavuraturas han il mument er lavur supplementara pervia dal coronavirus.

Il coronavirus e la lavur supplementara

«Il mument vegn trais giadas dapli laschiva da l'ospital chantunal a Cuira che normalmain», di Andrea Sanchez la manadra da team da la lavandaria industriala. La laschiva infectada vegn tractanda cun gronda precauziun e mesiras d'igiena strictas. Il contact cun quella laschiva duess esser uschè curt sco pussaivel avant ch'ella va en la maschina e vegn tractada chemic e termic.

La tema ch'il virus vegn en firma

Claudio Hauser il manader da fatschenta da la Zentralwäscherei è en stretg contact cun l'ospital ed uschia è l'agen persunal er vegnì sensibilisà anc ina giada sin la problematica dal coronavirus. «Il mender che savess capitar è ch'il virus vegness en chasa» tradescha Hauser. Ina furniziun da laschiva schubra e desinfectada saja dentant adina garantida – er grazia l'agen magasin da la lavandaria.

RTR actualitad 12:00