Workshops «TecLadies» a Cuira - Sa sfundrar en il mund da tecnica ed infurmatica

La sparta d'infurmatica e tecnica n'interessescha betg mo ils giuvens – en tut 33 giuvnas da 13 differents chantuns han fatg part da l'offerta da «Swiss TecLadies» e nizzegià la chaschun da sfundrar durant in'emna da camp pli profund en il mund da la tecnologia. Da roboters fin dronas – mintga di èn las giuvnas sa fatschentadas cun la funcziun da la tecnica en differentas branschas. E quai betg mo cun ina massa teoria, mabain a moda fitg interactiva cun experiments u incumbensa ch'i deva da schliar en la gruppa.

A trais dals workshops ha RTR dastgà prender part. Qua ils temas ch'èn stads en il focus:

In avegnir cun autos senza manischunz

Simplamain seser en l'auto e laschar sa transportar a la destinaziun senza stuair far insatge – transport autonom sa numna quai sche autos sa movan senza agid d'in uman. En quest workshop è vegnì tematisà cun experiments co ch'ils sensurs da quests autos funcziunan actualmain e tge che manca anc fin ch'ils autos autonoms pon daventar realitad. Era cun dumondas davart l'etica è la gruppa sa faschtentada.

Producir effizientamain dultscharias 

En hallas da producziun mettan roboters savens ensemen ils singuls tocs fin ch'in product è cumplet. Quai para bunamain sco ina coreografia perfecziunada, ma co sa il roboter nua ch'in toc tutga? Pussaivel fa quai l'automatisaziun dals singuls pass dal process. En quest workshop han las giuvnas sco gruppa survegnì l'incumbensa da reparar e controllar in automat da dultscharias uschia, ch'el producescha lur dultscharia preferida – e quai cumplettamain automatic.

Roboters sco assistents en la medischina

Era la medischina fa diever pli e pli fetg dal svilup tecnologic – saja quai durant operaziuns u la tgira da pazients. In'inschignera ha sclerì differentas dumondas en connex cun quest tema, sco per exempel: Quants spezialists dovri da construir uschè in roboter ch'assista al medi u tge incumbensas pon quels surpigliar? Er anecdotas or dal mintgadi d'ospitals cun roboters parta l'inschignera. La gruppa ha a la fin schizunt dastgà crear in agen code per la software.

Ina mentura per tuttas dumondas tecnicas

Era per giuvnas da 14 fin 19 onns ha «Swiss TecLadies» – l'academia svizra per scienzas tecnicas – ina purschida per approfundar lur savida da l'infurmatica e tecnologia, numnadamain in program da mentoring gratuit che cuzza set mais.

120 giuvnas or da l'entira Svizra sajan tenor Sandra Weidmann – manadra dal program – gia s'annunziadas per quest onn. L'idea è che mintgina d'ellas survegn sia atgna mentura ch'accumpogna e sustegna ella durant l'entir temp dal program. Las menturas èn persunas cun experientscha d'ina branscha tecnica. Tut tenor tge branscha ch'interessescha ina da las participantas vegn ina mentura adattada partida tier ad ella.

Durant in «welcoming day» emprendan la participanta e sia mentura d'enconuscher ina a l'autra e passentan il di cun workshops e differentas activitads. Set mais ditg han las giuvnas lura regularmain contact cun lur mentura. Ellas pon era visitar ulteriurs workshops, differentas firmas u accumpagnar lur mentura durant sia lavur.