L'interpresa d'aua ed energia IBC vul engrondir sia rait da chalira a distanza. Quai enfin il 2040 per proveder enfin lura anc dapli chasadas a Cuira cun energia neutrala al CO2, pia or d'aua sutterana, aua persa u laina. Quest project custa passa 300 milliuns. Per realisar el, druvass l'IBC da la citad da Cuira in credit da 60 milliuns ed ina segirtad eventuala da 20 milliuns, davart quest credit decida il suveran da Cuira ils 12 da mars.
La gronda part da las partidas èn perina e vulan sustegnair quest project. In comité che consista or d'exponents da pliras partidas è da l'avis che quai è la meglra schanza per dumagnar las finamiras da netto nulla il 2050.
Nus stuain vegnir davent da las energias fossilas e gist la citad da Cuira ha anc fitg bleras chasadas che stgaudan cun gas u ieli. Igl è necessari d'investir per pudair ir la via envers las finamiras al clima e che tuts ed era il clima po profitar a la fin.
Sulet ina partida n'è betg represchentada en il comité che s'engascha per il project da l'IBC – numnadamain la PPS. Els èn dal avis che il project saja memia ristgads e che la citad da Cuira avess anc d'investir bler dapli en quel ils proxims onns.
Quai dess anc dapli debits per la citad, blers plazzals sur lung temp atras la citad da Cuira ed era pli auts pretschs per stgaudar per la populaziun.
