Sch'ins cumpra la vignetta electronia per l'autostrada, lura sa referescha quella sin il numer da controlla da l'auto. Quai munta per exempel che sch'ins mida auto ubain sto midar la fenestra davant, lura na dovri betg ina nova. U era per quels ch'han in numer da controlla midaivel, quels dovran da nov sulet ina vignetta.
Tenor l'Uffizi federal da la duana e da la segirezza dals cunfins hajan els vendì dapi l'entschatta december 2023 radund 2 milliuns vignettas electronicas. Ils davos onns èn radund 10,5 miliuns vignettas vegnidas vendidas.
Sco ina retschertga sin las vias a Glion ha mussà, datti fitg differents motivs per sa decider tge vignetta cumprar. Quai va da pli blera simpatia per old school fin a pudair spagnar cun la nova vignetta electronica.
Sco la Polizia chantunala dal Grischun di sin dumonda, sajan las datas da la vignetta electronica tschaffadas sch'ins cumpria quella sur ina plattafurma uffiziala. Uschia dovri sulet in scan dal numer da controlla e la polizia vesa lura immediat sche la vignetta è activa. Tar auters vendiders da vignettas cusseglia la polizia da prender cun sai la quittanza da la vignetta.
