Via locala, naziunala e tren - Il traffic vegn spustà da Fideris a Küblis

En il Partenz vegnan construids cumplettamain da nov ils trajects da la via naziunala A28, da la lingia da la Viafier retica da Landquart a Tavau e da la via locala da Fideris a Küblis. Quai sin ina lunghezza da 3,5 kilometers, scriva la Viafier retica. Per projectar las novas construcziuns sin il traject Äuli – Dalvazza ha la Viafier retica realisà ina concurrenza da project. La RhB è incumbensadra directiva dals patruns da construcziun – l’Uffizi federal da vias (Astra), l’Uffizi da construcziun bassa dal Grischun e la Viafier retica.

En il rom dal trassé nov vegn la lingia da la Viafier retica dischlocada davent da Fideris levamain envers sid. Las rodaglias mainan lura davent da la staziun actuala Fideris tras il nov tunnel da Fideris ch'è 1’385 meters lung. Suenter il tunnel maina il traject sur ina punt da 200 meters. Per garantir en l'ulteriur decurs dal traject en direcziun da Küblis la segirezza cunter aua gronda dovri ina nova punt sur l'aual Ariesch ed ina nova punt da la Landquart Dalvazza. En tut dovri set punts novas ed in stabiliment da sustegn pli lung sin il traject da 750 meters tranter Äuli e Dalvazza.

Schlià differentamain l'incumbensa cumplexa

La realisaziun d’ina concurrenza saja in instrument adattà per augmentar – grazia a la concurrenza – la qualitad d’in project, scriva l’interpresa. Quai saja era stà il cas tar la concurrenza da projects per construcziuns en il sectur Äuli – Dalvazza. Ils quatter projects inoltrads sajan stads elavurads sin in nivel fitg aut e sa distinguan cleramain in da l’auter. Uschia han per exempel dus teams tschernì punts d’atschal e las duas ulteriuras punts da betun.

Era l’interpretaziun da las construcziuns artifizialas è vegnida schliada en moda differenta: Per l’ovra principala, la punt da viafier Äuli, importan las lunghezzas da las punts tranter 189m e 234m e la ladezza tranter 25m fin circa 50m. Ed era la concepziun dal traject tranter l’aual d’Arieschbach e la traversada da la Landquart da la vart da Küblis è vegnida schliada en moda fitg differenta. Trais da quatter teams da project han planisà en quest sectur ina construcziun da sustegn da 150 meters lunghezza ed 8 meters autezza. Il project victur ha tschernì in’autra idea: Cun colliar las duas punts pli curtas da la viafier ad ina singula punt lunga po vegnir desistì dal mir da sustegn.

Realisaziun fin l'onn 2030

Cun la tscherna dal project «STRAHLEGG» è cuntanschì in emprim term impurtant en il project cumplessiv «Fideris – Küblis, nov trassé». L’ulteriur urari prevesa d’elavurar il project d’approvaziun fin l’avust 2025 e d’eruir ils custs da las construcziuns artifizialas che n’eran fin ussa anc betg enconuschentas. L’execuziun da las lavurs da construcziun cumenza l’atun 2027 e dastgass durar circa dus onns e mez.