La vendemia ha cumenzà en il Grischun - e cun quai era il temp intensiv tar la viticultura Ladina Obrecht da Jenins. L'onn saja stà turbulent cun l'aura, di ella. L'enviern n'è betg stà propi fraid, la primavaira persuenter memia fraida e la stad memia bletscha. Pervia da la blera plievgia da la stad ha ella era gì da cumbatter cun bulieus, per exempel la sfarinussa, per tudestg «Mehltau».
Nus avain suà quest onn, quai stoss jau dir!
Auters viticulturs hajan pers l'entira racolta pervia da la sfarinussa, raquinta ella. Els hajan per cletg pudì salvar lur vits cun blera lavur ed in pau fortuna. L'atun haja alura salvà las racoltas. Cun las temperaturas chaudas han las ivas pudì madirar spert. Ma era quai è vegnì svelt extrem, uschia ch'els hajan stuì far enavant, per pudair prender giu tut las ivas a temp. En general è Ladina Obrecht dentant fitg cuntenta cun la racolta. I na saja betg daventà bler, ma persuenter saja la qualitad tant meglra.
La lavur è stada immensa davent da l'entschatta, dapi la primavaira. Ma ils ultims dis chauds han puspè auzà la qualitad.
Era Walter Fromm, cummissar da viticultura tar il Plantahof, è cuntent cun la racolta dal 2024. I saja stà in onn cun auts e bass, ch'ins sentia pli fitg la midada dal clima. Ils dis d'atun sajan stads optimals per arcunar l'aroma en las ivas, di el.
Tut en tut pon ins la finala tuttina dir che la racolta è stada in success quest onn - malgrà tut.