Legenda:
La spendrera Graziella Montalta.
RTR, Claudia Cadruvi
cuntegn
Vaz Sut - Spendrera rumantscha avra chasa da parturir
Il schaner avra Graziella Montalta ensemen cun duas collegas ina chasa da parturir a Vaz Sut. Ils ultims onns ha ella fatg bunas experientschas cun sia pratica a Cuira. Là porscha ella controllas da gravidanza, naschientschas ambulantas u accumpogna dunnas tras la gravidanza e la pagliola.
L’emprim onn ch’ella aveva avert sia pratica a Cuira ha ella gì diesch naschientschas – tschintg onns pli tard èsi gia var trenta. I sa tracta da naschientschas ambulantas en la pratica da hebamma u da naschientschas da chasa. «La dumonda per naschientschas ordaifer il spital vegn adina pli gronda», di la spendrera. Las dunnas en gravidanza tschertgian pli savens autras modas da parturir.
«Alma Sana» – olma sauna
La chasa da parturir duai avair num «Alma Sana»
Per nus èsi impurtant che las dunnas che partureschan tar nus restan saunas da corp – ma era da l’olma.
En sasez sa differenzieschia la chasa «Alma Sana» gnanc fitg dad ina chasa normala. I dettia stiva e cuschina, ina stanza da parturir cun bogn, duas stanzas per las dunnas en pagliola ed anc localitads per controllas e terapias.
Sa pajan las investiziuns?
D’avrir ina chasa da parturir pretenda pulitas investiziuns. Sin fundament da sias bunas experientschas ils ultims tschintg onns cun la pratica a Cuira è la spendrera persvadida che las investiziuns rendan. Agid survegn ella da duas collegas: ina surpiglia l’adminstraziun e contabilitad, l’autra porscha acupunctura cunter mals da gravidanza.
Daco ir en chasa da parturir?
Avrir la boxSerrar la box
Da 100 pops en Svizra naschan mo circa dus ordaifer in ospital. Las bleras dunnas prefereschan da parturir en in ospital nua ch’i dat medis, anestesistas ed apparaturas medicinalas.
Dunnas che giavischan ina naschientscha en ina chasa da parturir tschertgan ina atmosfera persunala. «Ellas na vulan betg questa hectica da l'ospital», di Graziella Montalta. La spendrera dumbra si ils criteris per naschientschas en ina chasa da parturir:
L’uffant sto esser saun
La mamma sto esser sauna
I na dastga betg esser ina naschientscha prematura
L’uffant sto esser en la dretga posiziun, pia cun il chau engiu
