Il project da PRE (per il svilup da la regiun) è vegnì lantschà avant 10 onns, dapi 5 onns èn ins vi da la planisaziun. Uss è cler, tgenins 12 projects singuls che duessan vegnir realisads.
- in post per rimnar graun (Poschiavo)
- fabritgar ora ina orticultura ed ina mazlaria da liongias (Poschiavo)
- valurisar la chascharia per la vendita da products 100% (bio) Valposchiavo (Poschiavo)
- in indriz per sientar ervas (Le Prese)
- ina halla da chavaltgar (Le Prese)
- in center per elavurar fritga, pumaraida, chastognas e nuschs (Brusio)
- engrondir la mazlaria da bio (Brusio)
- la producziun da Mozzarella (Cavaglia)
- la producziun d'ovs da bio
- «Frutti per tutti», differentas parcellas pitschnas da fritga, tgirads da purs per cleger sez
- plazzas da lavur integrativas per giuvenils
- ina chascharia sin in bain puril a Viano
Ils 12 projects vegnan a custar radund 16 milliuns francs. Il chantun ha uss deliberà ina contribuziun maximala da 3,43 milliuns francs. Da la Confederaziun vegnan spetgads ulteriurs 4,3 milliuns francs. Il rest pajassan ils purs sezs.
Sco project da PRE han ils purs lura 6 onns temp da realisar ils projects. Sche la Confederaziun dat glisch verda pon ils emprims vegnir realisads davent da quest atun.
100% (bio) Valposchiavo
Il project è naschì suenter il gea dal suveran da Poschiavo per il project d'ina ovra d'accumulaziun a pumpa Lago Bianco da la Repower dal 2009. L'idea è che uschia blers purs pussaivel produceschan bio e vendan lur products lura sut la marca 100% Valposchiavo che vegn commerzialisada da la societad da turissem. Cun questa collavuraziun tranter agricultura, turissem, gastronomia ed economia duai l'entira regiun profitar e sa rinforzar.
RR novitads 12:00