Il project d’in implant solar sin il Pass dal Bernina aveva sviluppà ed inoltrà il fundatur da Bernina Solar, Michael Jörg. Cuntravent e resalvas hai dà curt suenter da differentas varts, surtut da las organisaziuns per la protecziun da l’ambient. Entant è il project vegnì redimensiunà da 83 sin 58 hectaras, sco ch’il president communal da Poschiavo, Giovanni Jochum ha declerà envers RTR. Quel saja vegnì preschentà en il parlament da Poschiavo, sper in’ulteriura varianta anc pli pitschna cun 33,4 hectaras, dentant betg rentabla.
Novs investiders
Entant che l’interprendider Michael Jörg aveva lantschà sulet il project, èn en il fratemp tschintg novs possessurs da la partida. Quels èn represchentads en l’interpraisa «Mountain Sun Technologies» (MST) che ha cumprà 85 % da la Bernina Solar SA. 15 % restian en mauns dal fundatur Michael Jörg, uschia ha ditg il president communal da Poschiavo.
Anc bleras dumondas avertas
La populaziun da Poschiavo aveva approvà avant passa sis mais a l’urna da dar il terren sin il Pass dal Bernina en dretg da fabrica. Il contract tranter la vischnanca e la societad Bernina Solar prevesess in fit da 600’000 francs l’onn. Sche quest contract avess da vegnir revedì, na sappian ins betg dir per il mument, uschia Giovanni Jochum.
Vinavant aut squitsch
La Bernina Solar SA saja cun pressiun vid l’elavuraziun dal project, uschè l’infurmaziun en il parlament da Poschiavo. La realisaziun da l’implant solar sin il Pass dal Bernina per 180 milliuns francs, stat sut in immens squitsch da temp. Sco tut ils projects che vulan sustegn finanzial da la Confederaziun da fin 60% dals custs, avessan 10 % da l’implant gia dad esser en funcziun fin la fin dal 2025. Ils investiders sajan da buna speranza che quai vegnia a funcziunar.
