Il tunnel Val Alpetta è il segund d'en tut quatter tunnels ch'èn planisads per sanar la via. L'emprim tunnel Val Pischöt ha pudì vegnir surdà al traffic gia il 2017. Ils dus ultims tunnels – Val Cotschna e Val Mundin – vegnan realisads ils proxims onns, scriva il chantun.
Il nov tunnel è dapli che mo in'ovra da construcziun. El è in simbol per noss sustegn per la regiun da Samignun er en temps pretensius.
Quest pass vegn festivà da Carmelia Maissen, scheffa dal Departament d'infrastructura e l'inschigner chantunal Reto Knuchel. Prendì part da l'occurrenza festiva han er ils presidents communals da Samignun Daniel Högger e da Valsot Victor Peer, sco era differents giasts envidads.
Traffic pli effizient e segir grazia al nov tunnel
Grazia al vial ch'è set meters lad ed al profil interiur da 4,5 meters autezza po il traffic charrar ussa sin dus vials tras il tunnel. Uschia vegnia la circulaziun dal traffic optimada a moda decisiva, scriva il chantun. En spezial profiteschian da las midadas vehichels dal traffic public e da furniziun per la vischnanca da Samignun.
Era la segirezza vegnia augmentada considerablamain per tut las utilisadras e tut ils utilisaders da la via. Il tunnel cumpiglia numnadamain era plirs mirs da sustegn, la construcziun dal portal ost e vest sut tschiel avert sco er lavurs vi dal trassé.
Ulteriuras lavurs a partir dal 2025
Dal tut terminadas vegnian las lavurs en il tunnel Val Alpetta ad esser l'onn proxim, scriva il chantun plinavant. Durant la stad 2025 suondan anc la cuvrida finala e las marcaziuns definitivas en il tunnel. Plinavant vegnan tranter auter las installaziuns temporaras cunter crudada da crappa demontadas.
Preperaziuns per proxim tunnel han gia cumenzà
Las preparaziuns per la terza da las quatter etappas – il tunnel Val Cotschna – èn gia en planisaziun. La regenza ha approvà il project il november 2023. L'Uffizi da construcziun bassa vul cumenzar cun las lavurs da construcziun sco talas l'onn 2026.
