Avant bun duas emnas ha l'Uniun da chatschaders e chatschadras da patenta (BKPJV) publitgà ina retschertga da basa areguard las posiziuns ed ils sentiments dals chatschaders grischuns envers la chatscha en il chantun. Var 90 dumondas ha l'uniun fatg a ses commembers ed ils resultats mussan inqual interessants fatgs, lascha però avert inqual dumonda.
Maioritad e cuntenta cun la situaziun
Tenor la retschertga è il chatschader grischun fitg cuntent cun la chatscha sco tala e la lavur prestada da las instituziuns, tant dal BKPJV sco er da l'Uffizi da chatscha e pestga. Quai saja in resultat fitg legraivel ha ditg il president da l'Uniun da chatschaders e chatschadras Tarzisius Caviezel. I dat però er puncts, nua che l'opiniun dals chatschaders e da las chatschadras va in ord l'auter. Per exempel è be la mesadad cuntenta cun la chatscha speziala sco tala – in resultat che na fa betg surstar, la chatscha speziala è adina er puspè in tema politic. Ils motivs concrets per quella malcuntentientscha tar ina cumpart dals chatschaders e da las chatschadras na resultan però betg or da la retschertga. Il medem vala er per blers auters puncts. Però er tar la retschertga sezza datti dumondas avertas.
Rumantsch na gioga nagina rolla en la retschertga
Tar ina retschertga da basa tar chatschaduras e chatschadurs pudess ins bain spetgar da l'uniun grischuna che quella resguarda er il rumantsch – datti gea bain in qual chatschader rumantsch. La retschertga è però vegnida fatga exclusivamain per tudestg e talian. Il rumantsch è vegnì excludì dal tuttafatg. Tenor Tarzisius Caviezel sappian gea tut ils chatschaders rumantschs er tudestg, e plinavant hajan er motivs finanzials giugà ina rolla.
Jau na sun anc mai s'inscuntrà cun in Rumantsch che na chapescha betg tudestg.
Arguments ch'ins po suandar – interessant è però che la retschertga tira tuttina conclusiuns per las regiuns linguisticas. Tenor quella existan però sulettamain regiuns tudestgas e talianas en il Grischun. Confruntà cun questa critica na leva Tarzisius Caviezel betg pli prender posiziun pertutgant il rumantsch.
Communicaziun lascha avert dumondas
Tenor communicaziun è la retschertga vegnida fatga en collavuraziun cun l'Uffizi da chatscha e pestga sco er cun in'institut spezialisà:
Zusammen mit dem Amt für Jagd und Fischerei Graubünden (AJF) hat der BKPJV eine umfassende Mitgliederbefragung, unterstützt von einem spezialisierten Institut, bei den Bündner Jägerinnen und Jägern durchgeführt.
Sin la dumonda tge rolla ch'il Uffizi da chatscha e pestga ha giugà per la retschertga ha Tarzisius Caviezel però ditg che quel è sulettamain vegnì infurmà areguard ils resultats – per la retschertga sco tala n'haja il AJF giugà nagina rolla.
Er tar l'institut spezialisà datti dumondas. Il BKPJV n'ha betg vulì tradir tge institut che stà responsabel per l'evaluaziun ed ha schizunt duas versiuns. Tenor la versiun dal president Tarzisius Caviezel sa tracti dad in institut da Turitg, in institut dad in professer. Tenor versiun da Flurin Filli – responsabel per la lavur publica – sa tracti d'in student da l'Universitad da Turitg. Concret tgi ch'ha effectivamain realisà questa retschertga ch'il BKPJV ha publitgà n'ha nagin tradì envers RTR. Forsa n'han Filli e Caviezel simplamain betg infurmà in l'auter endretg, sbagls capitan. Propi prender temp per respunder a las dumondas avertas n'ha però er nagin vulì.
La retschertga è anc uss accessibla online e tgi che vul po anc adina respunder a quella. Las respostas na vegnan però betg pli registradas entras l'Uniun da chatschaders grischuns.
