Gian Marchet Schicktanz, oriund da Bos-cha, è in um grond cun ina cumparsa calma. La statura gronda e las chommas definidas da l'Engiadinais tradeschan svelt tge ch’è sia passiun: currer. Surtut currer sin lungas distanzas e quai en la natira.
Il sportist e student da 25 onns curra uschenumnads «Ultra Trail Runs». Cursas cun distanzas pli lungas che maratons, blers meters d’autezza e sin sendas e terren natiral.
Currer pli lunsch vul dir vesair dapli natira.
La passiun per il sport e la natira na vegn betg d’insanua. Gian Marchet Schicktanz è creschì si sin 1'600 meters a Bos-cha sin il bain puril da ses geniturs. Fin en sisavla classa n’aveva el betg apparats electronics ed è savens sa divertì cun giugar dadora e far sport. Quella giada eran quai il hockey, il ballape ed il freeski e dapi dus onns batta ses cor era per il currer.
Chattar ses cunfins en la natira
I saja ina cumbinaziun da pudair esser en la natira e da chattar ses cunfins, che fascinescha l’Engiadinais tar quest sport. Ils cunfins chattian ins numnadamain svelt. Uschia haja Gian Marchet Schicktanz pers nov da diesch unglas dals pes, tar las ultimas duas cursas. Quellas ha il currider almain gudagnà. El è stà sin l'emprim podest dal «Engadin Ultra Trail» e dal «Swiss Alps 100». Las unglas creschian puspè ed il cumbat cun las limitas dal corp saja tuttina l’interessant. Surtut il cumbat mental saja dentant grev. Las chommas portan el dalunsch ma il tscharvè cumenzia a far gieus durant las cursas nua ch’el è var 12 uras en gir.
Tar l’ultima cursa hai jau sperà da crudar, uschia ch’jau possia finir la cursa. Ins dovra trics mentals per quellas situaziuns.
Suenter «Ultra Trail Runs» vegn la fasa da recreaziun. Ins possia vegnir malsaun, di Gian Marchet Schicktanz ed il corp ed il tscharvè dovrian in enfin dus dis per sa remetter.
Anc betg cuntanschì l’entir potenzial
Malgrà las sfidas corporalas ed ils trenaments intensivs batta il cor da Gian Marchet Schicktanz per quest sport. L'atlet, che stat a Cuira, vul anc optimar ses trenament e sia dieta e pensa ch'el n’haja anc betg cuntanschì ses entir potenzial. Ina da sias grondas finamiras è l'Ultra-Trail du Mont-Blanc, ch’ha lieu l’onn che vegn. E là spera Gian Marchet Schicktanz era da vegnir in di sin l'emprim plaz.