La regenza da la citad da Cuira vul investir 88,1 milliuns francs en in nov implant da scola e da sport a la Ringstrasse. Il project da generaziuns, duai vegnir finanzià senza augmentar la taglia.
In augment da la taglia per quai project n'è betg necessari.
Sco la suprastanza ha communitgà, sto quel però l'emprim survegnir glisch verda dal parlament da la citad, quai gia il mars e suenter dal pievel. Quel duai votar anc quest onn davart il project.
Il project prevesa ina chasa da scola primara ed ina per la scola secundara, inclusiv las classas da talent. Plinavant duai dar ina halla da gimnastica tripla cun ina tribuna per 1'600 aspecturs ed in'aula cun 300 plazs. Sche tut va tenor plan, duai il project esser a fin il 2024/25.
La citad da Cuira po sa prestar quai project perquai ch'ella è en ina buna situaziun finanziala ed er perquai ch'il project è vegnì preparà durant ils davos onns.
Reutilisaziun sco schanza
Ils areals da las chasas da scola Daleu e Florentini duain vegnir nizzegiads en in'autra moda e maniera. La Scola professiunala artisanala a Cuira duai uschia survegnir dapli spazi che saja urgentamain necessari. Quai augmentia l'attractivitad, stgaffeschia plazzas da lavur a Cuira e sustegnia la mastergnanza. Uschia restia la scola Daleu ina scola. Auter guardia or cun l'areal dal Florentini. Entras ina reutilisaziun e valurisaziun possian ins per part refinanziar las investiziuns en la nova chasa da scola.
Ord da l'archiv
Cuira investescha en ils implants da sport, uschia er en il project «Eisball» a l'Obere Au. Glisch verda ha quel survegnì il november 2018 dal suveran da Cuira.
