Las restricziuns e mesiras per proteger da Covid-19 tutgian fermamain la hotellaria e la gastronomia, lur furniturs sco era collavuraturas e collavuraturs e lur famiglias, scriva Gastro Grischun. La situaziun economica e finanziala saja stada tendida tar blers manaschis grischuns ed independents gia avant il segund lockdown.
La serrada actuala dals 5 da december fin ils 22 da schaner 2021 chaschunia problems finanzials serius e pericliteschia l'existenza dals interprendiders e lur persunal. Tenor ina calculaziun da la branscha saja quai per quel temp in deficit da 70 milliuns francs. Quai per exempel cun tschains da locaziun che na vegnan betg indemnisads.
Surdà pretensiuns a la regenza grischuna
Cun la demonstraziun a Cuira han ils gastronoms surdà lur pretensiuns persunalmain al cusseglier guvernativ Marcus Caduff. Els pretendan tranter auter:
- Indemnisaziuns «à-fond-perdu» da 100% per la svieuta manchentada entras il lockdown.
- Indemnisaziuns per las mesiras da protecziun ch'ils restaurants han mess enturn.
- In agir spert e nunbirocratic da la politica.
Marcus Caduff: «Pretensiuns èn chapaivlas»
Tenor il minister d'economia Marcus Caduff èn las pretensiuns chapaivlas. Il chantun haja dentant schon instradà emprimas mesiras. Uschia hajan els dumandà a la Confederaziun per in sustegn da var 70 milliuns francs. Quels daners sajan per cumpensar ils custs fixs da la gastronomia. Vinavant possian ustieras ed ustiers dumandar anc avant la fin da l'onn per sustegn finanzial – quai dentant cun la pretensiun che la svieuta è per 40% pli bassa ch'auters onns.
Ch'i na va betg uschia spert sco giavischà da la branscha, haja dentant da far cun il process legal. «Simplamain avrir la cassa e dar or 100 milliuns francs na pudain nus betg», manegia el.
