La suprastanta da GastroSuisse Annalisa Giger ha bain chapientscha ch'i vala il mument da proteger la sandad. Tuttina saja la decisiun da serrar ustarias ina catastrofa per la branscha.
Era il president da Gastro Grischun, Franz Sepp Caluori, è dischillus.
Tuttina resta el optimistic ch'il Grischun possia schluccar las mesiras - forsa schizunt gia tranter Nadal e Silvester.
Per che quai gartegia, sto dentant la valur da reproducziun esser sut 1,0 e la incidenza da 7 dis sto esser sut la media svizra - e quai è il mument anc betg il cas en il Grischun.
Il president da las pendicularas grischunas, Martin Hug, è precaut. Bain sa legra el ch'il Cussegl federal ha decis da surlaschar als chantuns sch'in territori da skis dastga avrir u betg. Tuttina è la situaziun intscherta: Sur la fin d'emna ha la regenza decis d'avrir territoris da skis - glindesdi vul ella dentant discutar anc ina giada en chaussa.
