- La vischnanca burgaisa da Domat venda 9'000 meters quadrats per total 2,4 milliuns francs.
- Il chantun Grischun survegniss la mesadad da quella summa.
- La radunanza da la vischnanca burgaisa ha er incumbensà la suprastanza da vender la davosa parcella da 7'000 meters quadrats sin l'areal d'industria Vial.
Cun 93 cunter 2 vuschs tar nagina abstenziun ha la radunanza da la vischnanca burgaisa da Domat concedì la vendita.
Ils burgais offreschan la parcella per bun 2,4 milliuns francs a la BC Tech. La mesadad da quest retgav survegniss il chantun Grischun. Lez posseda ils dretgs da bajegiar e perquai sto la regenza anc approvar la vendita.
Plinavant ha la radunanza dals burgais era surdà a la suprastanza l'incumbensa da vender lur davosa parcella da 7'000 meters quadrats per cas ch'i dettia interessents. Tenor Theo Haas, il president dals burgais da Domat dettia anc naginas dumondas dad ulteriuras firmas.
Vender è meglier che «be» in dretg da bajegiar
Theo Haas, il president da la vischnanca burgaisa da Domat è cuntent che la firma BC Tech less cumprar il terren. La vendita sminueschia il ristg, manegia el. Tuts involvids hajan fatg scola cun il concurs da la resgia gronda, il qual haja custà la fin finala milliuns a Domat ed al chantun.
Plinavant saja cumplitgà da declerar ad ina firma internaziunala il dretg da bajegiar svizzer. Cun pudair vender il terren daventian las tractativas bler pli simplas.
La Hamilton SA sco magnet
La BC Tech è in furnitur impurtant per la Hamilton SA. Cun daventar vischins sin l'areal d'industria Vial da Domat, hajan las duas firmas pudì optimar la collavuraziun. Ed uschia spera Theo Haas, che la Hamilton SA attrai anc ulteriurs furniturs sin l'areal.
Plaz avunda
Tenor Theo Haas haja l'areal da l'anteriura resgia gronda anc in spazi liber da 90'000 meters quadrats. Plinavant èn 75'000 meters quadrats reservads per il cas ch'ina ulteriura resgia vuless sa chasar a Domat.
RR novitads 10:00