L'onn proxim accumplescha l'uvestg Vitus Huonder ses 75avel anniversari e cun quel duai ir a fin l’èra Huonder. Sche tut va tenor plan, vegn tschernì l'onn proxim in nov uvestg. L’allianza «Es reicht!» na vul dentant betg tscherner in nov uvestg, els vulan in administratur apostolic. Ina proposta ch'è gia vegnida avant in temp dal vicari general Martin Kopp.
L'allianza di che sut l’uvestgieu, ch'ageschia fitg conservativ e spartia la raspada, na pateschian betg mo ils catolics mabain tut las baselgias svizras.
La situaziun en l’uvestgieu da Cuira è uss dapi quasi 30 onns inquieta. Uss èsi temp per in nov cumenzament.
Suenter che l’uvestgieu da Cuira ha gì cun l’uvestg Wolfgang Haas e l’uvestg in uffizi Vitus Huonder dus uvestgs che polariseschan vul l’allianza «Es reicht!» far urden.
«I tanscha!» – in dubel senn
Questa expressiun na valia betg mo perquai ch'i tanscha – els hajan avunda d'ina baselgia che disciplineschia ed excludia, d'ina baselgia che n'emprendia betg. L'expressiun valia er per quai ch'i tanscha – i haja avunda per tuts, la baselgia haja avunda plaz per quels che vulan tutgar tiers, avunda confiert per quels che dovrian.
Per questas valurs vul l'allianza sa metter en. Ord quai motiv vul l'allianza er ina midada structurala. Els vulan ch'ils dretgs umans sajan er garantids en la baselgia. Las conferenzas dals uvestgs regiunalas duain survegnir dapli libertads, ils uvestgs sez duain vegnir elegids tras il pievel ed ils plevons. Plinavant vulan els che las plaivs s'orienteschian vid l'abitadi da la populaziun e betg al dumber dals plevons.
RR novitads 12:00
