Sco gia supponì pli ditg datti in nov triep da lufs en Surselva. Uss conferma l'Uffizi chantunal da chatscha e pestga uffizialmain ch'i dat in nov triep. Fin uss hajan ins pudì observar trais animals giuvens. Il revier dal nov triep cumpiglia il territori da Sursassiala e s’extenda sur ils territoris communals da Tujetsch, Mustér e Medel. Il nov triep survegn la designaziun «triep da Stagias».
Lufs giuvens
Vinavant conferma l'Uffizi intgins lufs giuvens. Lufs pitschens dettia en il triep dal Beverin. Quants chagniels na saja dentant betg cler. Vinavant hajan ins vesì en il nord da Glion dus lufs creschids cun tschintg pitschens. Qua sa tractia probablamain dal triep dal Piz Bargias.
Er en la regiun Sursaissa datti indizis, ch'il triep da Valgronda haja survegnì lufs pitschens. Davart il dumber na possian ins dentant far naginas indicaziuns.
Naginas infurmaziuns davart luf pitschens datti per il triep dal Calanda.
