Dapi in onn èsi guerra en l'Ucraina. A quell'occasiun tira il Cussegl federal ina bilantscha: El condemnescha l'attatga russa e pretenda ina fin dals cumbats. Plinavant sustegn el in'examinaziun da violaziuns da dretg internaziunal avant la curt penala internaziunala.
Agid umanitar
Per la glieud ch'è pertutgada da la guerra en l'Ucraina e la Moldavia pretenda el ulteriurs 140 milliuns francs. 114 milliuns van en favur da l'Ucraina, 26 milliuns en favur da la Moldavia. Passa 270 milliuns ha il Cussegl federal gia pajà a l'Ucraina sco sustegn. Passa ina milliarda ha el concedì per fugitivas e fugitivs ucranais en Svizra.
Sancziuns cunter la Russia
La Svizra ha surpiglià las sancziuns da l'UE cunter la Russia. Passa 1'300 persunas e 170 organisaziuns èn pertutgadas. Ellas tutga ina bloccada da daners sin contos svizzers, scumonds da far commerzi, d'entrar la Svizra ed autras mesiras finanzialas.
La Svizra saja solidarica cun l'Ucraina e s'engaschia per ina schliaziun politica dal conflict. Il Cussegl federal admetta plinavant ses engraziament als chantuns e las vischnancas, e cunzunt a las persunas privatas ch'han prendì si 25'000 da las 75'000 persunas ucranaisas ch'han tschertgà protecziun en Svizra.
