Omadus candidats èn colliads fermamain cun la vischnanca ch'els vulan presidiar il futur. Omadus èn creschids si, abiteschan e vivan uss er a Trimmis. Stocker ha 29 onns ed agescha il mument president ad interim, quai suenter che l'anteriur president communal da Trimmis Roman Hug è sa retratg la primavaira. Joos ha 56 onns ed è en funcziun sco substitut da la suprastanza.
Nicola Stocker
Nicola Stocker lavura sco agronom tar in fiduziari ed ha 29 onns. Sia carriera politica ha cumenzà en giuvens onns: Cun 19 onns ha el fatg part da la cumissiun per la planisaziun da las finanzas da Trimmis. Vinavant ha el presidià la Giuvna partida populara Svizra dal Grischun. Dapi dus onns è el sco deputà da la partida populara en il Cussegl grond.
Sco president vi jau avair in'ureglia per la populaziun e sviluppar schliaziuns per il vitg.
Sch'el avess da daventar president veglia el cunzunt cuntinuar cun la lavur ch'el ha prendì si uss sco president ad interim dapi la primavaira. I girian divers projects che pertutgan per exempel l'infrastructura u il nov lai da far bogn a Trimmis. Vinavant accentuescha Nicola Stocker ch'el fiss il sulet da la suprastanza che cuntinuass er cun la lavur en suprastanza. Ils auters commembers da la suprastanza han numnadamain demissiunà, quai per differents motivs.
Crispin Joos
L'um da 56 onns accentuescha ch'el haja – sco substitut da la suprastanza – gì invista en tut ils departaments ed è persvas d'avair cunquai in bun fundament. El è interprendider en il sectur d'infrastructura da rait. En la politica locala agescha el dapi passa 20 onns. En quest connex menziuna el il presidi da la cumissiun da perimeter, la suprastanza da la plaiv u er ch'el è stà suppleant en il Cussegl grond. Politicamain è Crispin Joos dachasa en la partida dal Center Grischun.
Sco interprendider sai jau tge ch'i vul dir da manar persunal, da purtar la responsabladad per las finanzas e da garantir che la clientella è cuntenta.
Sch'el avess da daventar president communal, veglia el realisar differents projects ch'èn stads en planisaziun. Concret menziuna l'um da 56 onns ch'ha dus fegls creschids la scola. Uschia dettia gia plans per optimar il manaschi da la tgira d'uffants, la maisa da mezdi, la scolina e la scola dovria schliaziuns dettia gia plans. Quels stoppian uss vegnir realisads.
Tgi che presidiescha a partir dal 1. da schaner 2025 la vischnanca da Trimmis decida il suveran ils 22 da settember a l'urna.
