Tras vitgs, vals e sur pizs - Ina giada a travers il Grischun – uss per guardar

Otg dis ed otg etappas. 250 kilometers 15'000 meters d'autezza han Livio Foffa e ses chaun Lui fatg ensemen cun ils umens da camera Curdin Fliri e Roman Schmid.

Davos las culissas

Qua pudais anc ina giada reviver las differentas etappas ch'ils trais umens ed il chaun han fatg.

Ils high- e lowlights da Livio

L'arrivada a Müstair è stada in dals puncts culminants per Livio Foffa. Là è el vegnì beneventà d'amias ed amis ch'el enconuscha ed ha gì plaschairun suenter ils 250 km viadi. In dals puncts ch'è stà plitost negativ, saja stà ch'i hajan savens stuì far in zic prescha. Ma ils highlights sajan definitivamain stads bler pli numerus. Las entupadas cun la glieud sin viadi sajan stadas uschè cordialas, ma er ils discurs davos las culissas cun Curdin Fliri e Roman Schmid sajan stads grondius. Definitivamain sajan dentant las cuntradas da bellezza stadas bellezza, sco er la levada dal sulegl ma er da chavaltgar.

Qua sut vesais vus anc ina giada las staziuns ch'il quartet ha fatg durant ils otg dis da viadi.

La davosa etappa è dumagnada

Livio ha raquintà en ses rapport quotidian anc ina giada da la bella surpraisa ch'els han entupà l'anteriur moderatur da SRF Nik Hartmann il settavel di, ch'ha lura er accumpagnà els in toc. Nik Hartmann ha fatg da quellas aventuras cun ses chaun gia bleras giadas. Il davos di da l'etappa è la finamira stada d'arrivar a Müstair. La notg han els durmì a San Jon, il plan per il di è stà dad ir in toc a chaval ed il davos toc a pe fin a Müstair. Per Livio è quai in dals puncts culminants perquai ch'el arriva en sia patria, nua ch'el è creschì si. La saira han lura amias ed amis beneventà il quartet a Müstair. Cun quai è ì a fin il viadi dad otg dis da Mustér a Müstair.

River rafting per arrivar a Chapella

La saira avant èn els arrivads a l'Open Air Chapella ch'ha propi plaschì a tuts ed è stà ina buna finiziun dal di. Da Chapella fin a San Jon han els pudì scursanir il viadi sur l'aua. Davent da Susch fin Ardez han il trais umens dastgà far River Rafting che saja stà ina bellezza experientscha. Il chaun Loui dentant n'ha betg participà a questa aventura, quai fiss stà memia bler stress per el. Il collega Severin ha guardà dad el durant quest temp. Durant il discurs cun Livio era il quartet al Lai Nair. A Tarasp han els entupà l'anteriur moderatur Nick Hartmann dad SRF, ch'ha accumpagnà els fin il Lai Nair.

Finalmain far la duscha suenter quatter dis

Suenter avair durmì giuadora ed esser ì tras il tunnel da l'Alvra hai lura finalmain dà ina duscha. Quai è stà in dals highlights dal tschintgavel di. L'etappa sis è dentant stada ina in zic pli patgifica, igl è ì da Bever a Chapella ed els n'han betg fatg tants meters d'autezza. Las vaschias da Curdin faschevan anc adina mal, ma igl era da restar ferm ed el ha ignorà ellas. Il barbagiat han els cunzunt sentì ils emprims dis. En quest mument saja quai dentant in zic passà.

Di 5: da la Chamona Ela enfin a Bever

Il tschintgavel di ha manà il quartet dal Grischun Central en l'Engiadina. Auter che planisà han Livio e ses cumpogns dentant fatg il viadi a pe tras il tunnel da l'Alvra. Planisà era dad ir suravi. Loui è probablamain l'emprim chaun che ha pudì traversar uschia il tunnel. Discurrì ha Livio er davart il tema impurtant dals dretgs chalzers. Ma betg be il chalzer è impurtant. El ha pudì schliar ses problems cun ils pes entras ina buna socca. In tip che renda forsa ina giada in'emprova.

Il quart di è stà dir

Gievgia èn ils umens stads da viadi da Ziteil fin la Chamona d'Ela. Per Curdin è il viadi dentant plaunet vegnì dolurus. El ha survegnì vaschias vi dals pes, dentant ha el mors sin ils dents ed è ì vinavant. Er il chaunin Loui ha fatschentà Livio. El era bain fittischem, dentant ha el in zic mal vi d'ina toppa. Suenter ina visita tar la veterinaria, ha quella dentant dà l'OK. Per Loui saja quai ina vita da siemi, el fiss probabel permalà sch'el na pudess betg cuntinuar il viadi.

Ma dasper ils quitads hai er dà highlights. En il guaud ha Livio inscuntrà Astrid Thurner. Ella è droghista ed ha declerà als umens las ervas medicinalas e quellas per mangiar. Da mezdi han els lura fatg in bun risotto cun las ervas.

Sin il Piz Beverin – il terz di ha cumenzà baud

Tschanà han els in bun risotto, lura han Livio, Loui, Roman e Curdin durmì sut tschel avert. Durmì n'han els betg bler. Livio ha gì da parter il satg da durmir cun Loui ed il plaz è uschia stà in zic limità. Ma, il dasdar baud ha rendì. La levada dal sulegl sin il Piz Beverin, definitivamain in'experientscha che vala la paina. Er il viagiar da notg è stà in eveniment tut spezial. Finamira dal terz di è stà dad arrivar fin a Ziteil.

Il segund di e la punt da stgarpitsch

La via ha manà Livio e sia cumpagnia atras la Lumnezia. Gia curt suenter l'entschatta hani gì la sfida da traversar in flum – la punt n'era betg pronta per duvrar. Grazia a Guido Derungs hani pudì evitar da stuair returnar ils 250 meters d'autezza a Degen. Il di ha lura cuntinuà sur il Güner Lückli en Val Stussavgia e sin il Glaspass han Livio, Curdin e Roman alura survegnì il material per bivacar quella saira.

L'emprim di ha cumenzà bain

Bler sulegl ed in tschiel blau – la partenza era glindesdi a las 06:00 tar la claustra a Mustér. L'emprima surpraisa ha era gia spetgà Livio Foffa avant la claustra. Avat Vigeli ha surdà ad el in regal per las mungias da la claustra da Müstair ch'el ha pudì surdar il davos di. Quest di èsi anc ì sin la chamona Terri. sin quest viadi han els dastgà ir in toc cun il bus alpin. Suenter èsi ì vinavant sur il pass Diesrut e lura or a Vrin, nua ch'ils trais umens han durmì l'emprima notg.

Il prim «selfie» cun Livio ha gudagnà

Avrir la box Serrar la box

Mintga di da lur tura ha insatgi gì la schanza da gudagnar in «satgados da RTR» emplenì cun chaussettas ch'ins po tranter auter er duvrar sin ina tura da viandar.

Ils victurs dal satgados

La saira avant la gronda tura

Ils satgados èn preparads ed ils trais umens pronts da partir. La saira avant han ils viandants passentà en in'hotel a Mustér e han giudì anc ina buna tschaina avant la gronda aventura. Livio Foffa è sa legrà fitg ma è era stà in zic gnervus. Glindesdi cumenza il viadi tar la claustra a Mustér. Sco el ha raquintà eri planisà da partir gia las 06:00. Las prognosas da l'aura eran bunas uschia ch'ils trais umens na quintavan betg cun pli gronds impendiments da lezza vart.

Las etappas