Il traffic public duai, tenor lescha federala, esser accessibel er per persunas cun impediments. En il Grischun èn 12% da las staziuns da bus e 37% da las staziuns da tren prontas. Fin il 2023 duai quella quota vegnir auzada sin 24%, resp. 40%.
Sco la regenza grischuna ha respundì sin ina dumonda or dal Cussegl grond, duajan las ulteriuras staziuns vegnir sanadas suenter l'onn 2023. Staziuns che vegnian pauc frequentadas en regiuns muntagnardas na duain betg vegnir sanadas. L'impundiment saja memia aut, uschia la regenza grischuna vinavant.
Lescha federala na vegn betg ademplida
Fin 2030 sajan 70% da las staziuns da la Viafier retica adattadas als basegns da persunas cun impediment. Da la Viafier Matterhorn-Gottard èn gia tuttas, cun excepziun da la staziun da Sedrun, adattadas.
Il termin per ademplir a la lescha federala davart l'accessibladad è la fin da december 2023. Tenor il chantun èn las las vischnancas responsablas per bajegiar enturn las staziuns, cun paucas excepziuns.
Or da l'archiv:
