Quest onn è il Grischun mitschà bain da las colonnas da traffic, quellas hai numnadamain insumma betg dà. René Schuhmacher, il pledader da medias da la Polizia chantunala fa gia dapi nov onns il servetsch da Pasca e dapi lura saja quai stà in dals ruassaivels servetschs.
Jau na ma poss betg regurdar da dis da Pasca uschè calms sin via ils ultims onns.
Tut en tut haja dà 12 accidents ils dis da Pasca sin las vias grischunas, quai saja mez uschè bler sco l'onn passà, di René Schuhmacher. Pliras vias en il chantun Grischun han stuì vegnir serradas temporarmain per motivs da segirezza pervia da la plievgia intensiva. Er plirs pass grischuns èn stads serrads temporarmain. Uschia èn las vias dals pass Güglia e Malögia stadas serradas pervi dal grond privel da lavinas. Er la Retica ha gì da cumbatter cun disturbis: La lingia dal Bernina resta serrada per il mument. Cunquai che era la via sur il Bernina è serrada na pon betg vegnir en funcziun bus da remplazzament. Uschia ch'il Puschlav n'è betg cuntanschibel nà dal Grischun.
Ins era sa preparà sin bler traffic
En il sid è la prognosa d'aura stada schletta per ils dis da Pasca. Tuttina han ins spetgà colonnas sin las vias en direcziun sid. Quai ha ditg mesemna avant Pasca Thomas Rohrbach da l'Uffizi federal da vias Astra. Perquai che Pasca saja quest onn fitg baud, saja supplementarmain er anc da quintar cun bler traffic en direcziun dals territoris da skis.
Sin l'A13 e sin vias principalas en il Grischun possia dar bler traffic. Ed era tar la staziun per chargiar l'auto al Vereina dovria pli probabel pazienza, quai tranter la damaun a las 08:00 e la saira a las 16:00. L'experientscha saja ch'il traffic da Pasca sin via cumenzia mesemna suentermezdi. A partir da lura stoppian automobilistas ed automobilists quintar cun colonnas, cunzunt davant il portal dal nord dal Gottard.
Restar sin l'autostrada per evitar collaps
L'Uffizi federal da vias appellescha da restar sin las autostradas era sch'i dettia colonnas. Quai per evitar ch'il traffic collabescha cumplettamain sche era las vias principalas e lateralas èn bloccadas cun autos ch'emprovan da guntgir las colonnas. Sur ils dis da festa saja l'uffizi perquai en stretg contact cun las polizias chantunalas.
Per il Grischun han ils responsabels da l'Uffizi da construcziun bassa gia decidì il schaner da cuntinuar cun il sistem da dosar il traffic sin la via principala tras il Partenz e sin l'A13 tranter Zezras ed il tunnel d'Isla Bella. Quest sistem saja sa cumprovà l'onn passà. Uschia eran abitantas ed abitants disturbads pli pauc ed organisaziuns d'urgenza sco ambulanza, polizia e pumpiers han pudì passar tras ils vitgs.
Dapli trens
Per evitar las colonnas da traffic da Pasca al Gottard pon ins prender il tren. Las Viafiers federalas han planisà 49 trens supplementars cun 49'000 plazs da seser. I vegnia dentant recumandà da reservar il plaz, cunquai ch'intgins trens sajan gia cumplettamain occupads, scriva la SBB.
Sch'in tren saja bler memia plain, alura na dastgia quel betg traversar il tunnel dal Gottard, quai saja il cas sch'in tren saja occupà cun passa 140% da la capacitad. Alura stoppian passagiers sortir dal tren, uschiglio na cuntinueschia quel betg.
