«Tischlein deck dich» - Salvar mangiativas per il bun intent

2,8 milliuns tonnas van a perder

Mintg'onn van 2,8 tonnas mangiativas en Svizra en il rument. Quai che l'uniun Maisa magica po salvar, vegn sco emprim controllà e sortì en in dals set deposits logistics. Da là vegnan las mangiativas repartidas sin in dals entant 150 posts da distribuziun en l'entira Svizra e dal Principadi dal Liechtenstein. En quests posts da distribuziun pon persunas ch'èn pertutgadas da povradad emplenir, cunter in pretsch simbolic dad 1 franc, ina gia per emna ina tastga plain rauba da mangiar. Tenor il manader da l'uniun Maisa magica Svizra Alex Stähli, na tanscha la purschida betg per cuvrir l'entira dumonda. Ma cunquai che l'uniun haja la pussaivladad da rimnar anc adina dapli mangiativas, engrondeschian els cuntinuadamain lur offerta.

L’onn passà ha l’uniun pudì salvar e reparter 7'000 tonnas mangiativas. I sa tracta oravant tut da rauba frestga sco legums, fritgs, paun e products da latg. Mangiativas da basa sco ris, farina e rauba da pasta datti perencunter plitost darar, perquai che quellas sa tegnan ditg e na ston strusch vegnir salvadas dal sfarlattim.

Tgi dastga retrair mangiativas?

Per pudair retrair victualias pretenda l'uniun ina carta da clients. Quella vegn emessa dals uffizis socials, ch'examineschan mintgamai la situaziun finanziala dals interessads. Uschia duai vegnir garantì, che la purschida vegn duvrada mo da persunas che han basegn da sustegn.

En l'entira Svizra èn enturn 8% da la populaziun pertutgads da povradad. La povradad po vegnir favurisada tranter auter tras malsognas, istorgias da migraziun u era crisas persunalas. Sper la furniziun da mangiativas porscha l'uniun Maisa magica era lavur u scolaziuns per persunas dischoccupadas.

Bun 4'000 voluntaris lavuran per l'uniun

L'uniun vegn finanziada cun donaziuns, e bun 4'000 persunas prestan lavur voluntaria. En il Grischun datti il mument 12 posts da distribuziun. In da quels sa chatta en la sala Comander a Cuira, nua ch'ins po retrair mintgamai il venderdi avantmezdi mangiativas. Cornelia Zogg lavura gia dapi tschintg onns sco manadra da quest post. Ella coordinescha l'engaschament dals voluntaris e da las voluntarias e da la purschida emnila, nua che var 90 clientas e clients survegnan ina tastga plain mangiativas. Per quai vegnan furnidas tranter 1,5 e 2 tonnas mangiativas or d'in deposit logistic da la Maisa magica.