Il Grischun è il segund chantun che reducescha il dumber da tests. Gia dapi il glindesdi na datti en il chantun Argovia nagins tests repetitivs pli en las scolas, mabain mo pli en las instituziuns da sanadad e da tgira. Era en l'Argovia na tanschan las capacitads dals labors betg pli per tuts che vulan sa laschar testar. Da l'autra vart ha il chantun Berna gist annunzià da lantschar in program per tests repetitivs en sias scolas. Per Tobias Bär, il pledader da la Conferenza svizra da las directuras e dals directurs chantunals da sanadad GDK, n’è quai nagina cuntradicziun.
Sch’i dat en in chantun ina stretga tar las capacitads da testar lura na sto quai betg muntar ch’ina autra regiun da la Svizra ha ils medems problems. Perquai sto mintga chantun sez valitar quai.
Fatg saja che mintga chantun decidia sez sche e nua ch'el vul far tests repetitivs. Da coordinar u era unifitgar ils criteris na saja ord vista da la GDK il mument betg prioritar.
Sin livel politic n’ha quai anc betg dà in barat en questa chaussa ils ultims dis. Il tema da la strategia da test vegn dentant discutà tut il temp. Tant sin nivel dals chantuns sco era sin nivel da la Confederaziun.
Els quintian dentant era ch'anc ulteriurs chantuns vegnian a reponderar lur strategia da testar. Impurtant saja dentant che persunas cun sintoms e lur persunas da contact hajan vinavant la pussaivladad da far in test, di Bär. Finamira saja e restia d'impedir ina surchargia dal sistem da sanadad. Tut tenor il svilup dals proxims dis ed emnas possia quai lura era muntar ch'ins stoppia reponderar las mesiras da protecziun che sajan ussa en vigur.
Ussa avain nus cunzunt mesiras per spazis interns – e da ponderar fiss sch’i dovra supplementarmain era restricziuns per occurrenzas grondas.
La mesemna s'entaupa il Cussegl federal per sia emprima sesida suenter ils firads da Nadal e Bumaun. Forsa ch'el dettia en consultaziun ina reducziun dal dumber d'aspectaturs per talas occurrenzas, speculescha Tobias Bär. Grondas midadas na spetgian els il mument dentant betg.
