La tessaria a Poschiavo ha difficultads – betg mo finanzialas, ma er en la perspectiva da la gestiun da la tessaria. La societad purtadra Cooperativa «Tessitura di Valposchiavo» duai vegnir schelta fin la fin da matg.
Nova speranza per la tessaria
Uss èn sin maisa 3 pussaivlas soluziuns per la societad – inclusa è er la tessaria:
- La prima varianta è da far vinavant sco fin uss. Ils revisurs da quint chattan ch'ils meds finanzials na manchian betg, e ch’ins possia laschar temp per tschertgar soluziuns finanzialas per la tessaria e la gestiun da l’interpresa.
- La segunda varianta è da manar ensemen il MOVIMENTO – la societad per umans cun impediment – e la tessaria.
- La terza varianta: ina nova societad cun il num «Pro Tessitura Valposchiavo» surpigliass la tessaria e la butia. La nova societad consistiss da mastergnanzas localas, donaturs privats, organisaziuns localas e dal center d’ideas e furmaziun, la POLO Poschiavo. Cun preschentar il project da la tessaria al chantun Grischun ed a la confederaziun duai vegnir chattà ina soluziun finanziala e durabla per mantegnair ils posts da lavur.
L'avegnir saja garantì
La finala han ils commembers e las commembras da l’uniun purtadra decidì per la soluziun da surdar la tessaria a la «Pro Tessitura Valposchiavo». Tenor il president da l'associaziun haja dà paucas discussiuns davart tschellas soluziuns. Il futur da la tessaria saja segirà grazia al grond sustegn dals commembers e las commembras da la nova uniun. Uss haja la nova direcziun temp da tschertgar la dretga via per la tessaria ed uschia er mantegnair las plazzas da lavur en la Val Poschiavo.
Or da l'archiv:
RTR aveva rapportà da la situaziun precara en quella che la «Tessitura Valposchiavo» sa chattava.
