Panaduz sa chatta datiers da la reuniun dal Rain Posteriur e dal Rain Anteriur en la regiun grischuna Plaun (Imboden). Panaduz è situà tranter ils vitgs vischins Rehanau en il nord e Razén en il sid.
Datas fundamentalas da Panaduz
- Actualmain vivan passa 3'330 abitantas ed abitants a Panaduz
- Autezza sur mar: 662 meters
Populaziun crescha ad in crescher:
1850: 581 abitants, 2000: 2'433 abitants ed il 2018: 3'331 abitants
- 87,9% da la populaziun discurra tudestg, 5,4% rumantsch e 2,1% talian
L'istorgia – ina curta survista
Panaduz è l'emprima giada vegnì menziunà en in document dals 960. En quest document vegn discurrì d'in «castello Bonaduces». Sche quai num è collià al chastè Wackenau n'è betg segir. Il chastè Wackenau vegn numnadamain pir menziunà dad Ulrich Campell enturn l'onn 1573. Oz dentant exista quel be pli ord ruinas.
Durant il temp medieval era Panaduz part dal Signuradi da Razèn. Uschia che la vischnanca è era stada en il possess dal cont «von Zollern» enturn 1458. Silsuenter è la vischnanca vegnida transferida al Habsburgais Maximillian I. da l’Austria. Ord quest motiv è Panaduz restà catolic durant la refurmaziun. Pir il 1819 è Panaduz vegnì transferì ensemen cun l’entir Signuradi da Razén al chantun Grischun.
La vopna da Panaduz
Las lingias blauas sa refereschan sin duas differentas chaussas: Sco emprim inditgeschan quellas il «Rain Anteriur» ed il «Rain Posteriur» che vegnan ensemen a Panaduz e culan uschia sco «Rain» en il Lai da Constanza e la fin finala en la Mar dal Nord. L’autra explicaziun è che quests stritgs blaus mussan ils spartavias impurtants per il commerzi da pli baud. Ina via da commerzi cuntinuava numnadamain en direcziun Alpsu e l’autra en il sid a Bellinzona. La staila cotschna è il simbol da la Sontga Anna ch’è medemamain era ina da las patrunas da la baselgia «Mariä Himmelfahrt» a Panaduz.