Il territori da skis Hochwang en il Scanvetg ha cumbattì divers onns cun difficultads finanzialas. Ina gruppa d'interess ha la stad passada vulì ramassar 800'000 francs. Questa finamira è vegnida cuntanschida cleramain: in milliun francs è vegnì ensemen. Perquai è il territor da skis ussa puspè avert.
Nossa finamira era da pudair surviver tschintg onns. Per il mument na guarda quai betg ora mal – nus avain reservas finanzialas – ma i dovra ussa buns envierns. La sfida vegn ad esser il mantegniment tecnic dals implants ch’han cuntanschì ina vegliadetgna che pudess chaschunar reparaturas pli grondas.
Dus ustarias èn avertas en il territori da skis
Bain marscha quai il mument er en las dus ustarias dal territori da skis. Marco Schwendener ch'è dapi 11 onns ustier da la chamona Hochwang ha ditg ch'el haja anc mai fatg uschè buns affars sco quest onn sur ils dis tranter Nadal e Bumaun. Anc nagin'experientscha en la restauraziun dal Hochwang ha Jasmine Grigis che maina da nov l'ustaria Triemel. Perquai che l'ustaria stettia fitg a cor ad ella, haja ella spontan decidì da manar l'ustaria.
