Territori da skis da Lai - Dis da festa sin pista: blera glieud na munta betg adina stress

La damaun a las 8:30 – l’emprima cabina è gist partida ed ils skiunz e las snowboardistas entran in suenter l’auter en il bajetg da la staziun a val dal territori da skis da Lai. Las quatter cassas èn tuttas occupadas e malgrà ch’i sa furma ina colonna avant tut las cassas, para nagin propi d'esser stressà.

Era la glieud para d’esser ruassaivla, era sch’els ston passentar lur temp endadens e betg sco quai ch’els giavischassan, ordavert sin las pistas. Il bler vendan las trais collavuraturas ed il collavuratur bigliets u ch’els ston schliar problems. Ina giada n’è il bigliet betg chargià endretg sin la carta, in’autra giada ha insatgi emblidà il Swisspass a chasa.

Er ils collavuraturs e lavurants si en il territori da skis paran d’esser disads ch’i marscha dapli durant ils dis da Nadal. Els san ch’i na gida betg da sa grittentar – era sch’i dat mintgatant persunas che vulan exnum entrar en la pendiculara, malgrà che quella è pli che plaina.

Era la clientella para d'esser cuntenta cun la purschida: Tuts 43 indrizs èn averts quella sonda. Cun quai è il territori da skis da Lai ed Arosa in’excepziun, tuttina – adina puspè vegn menziunà che la naiv manchia.

Damai ch’il territori da skis sa reparta sin 225 kilometers da pista, sa reparta era la glieud. Tuttina, guntgir dal tuttafatg las colonnas na po nagin.

I para che las bleras persunas èn pertschartas ch’ellas na ston quels dis betg mo prender cun ellas la chapellina ed ils vons, mabain era in zic dapli pazienza. Avair pistas be per sa sez durant ils dis tranter Nadal e Bumaun n’è betg pussaivel – cunzunt sche l'aura tira sin pista.