Entant che tscherts pass sco il pass dal Güglia u il Bernina restan averts tut l'onn, èn set pass en Grischun adina serrads sur enviern. Ussa vegn puspè il temp da primavaira e d'avertura dals pass.
Sco che l'Uffizi da construcziun bassa ha ditg envers RTR vegnian tscherts pass averts quest onn in pau pli baud che auters onns. Quai pervi da l'enviern miaivel cun pauca naiv. En congual cun l'onn passà na datti dentant betg grondas differenzas.
Betg be la naiv decida
Ch'il Pass da l'Alpsu ed il Pass dal Spleia vegnan avrids bler pli baud na saja probabel, uschia il chantun vinavant. Parts da lur vias vegnan numnadamain duvradas per las pistas da skis. Tar il pass da l'Alpsu sto l'avertura en pli vegnir coordinada cun il chantun Uri.
La Forcola di Livigno vegn averta mintg'onn l'emprim glindesdi da zercladur independentamain da la quantiad da naiv, quai ha decidì la regenza il 2016.
Davart l'avertura dal Flüela n'è betg anc clera, l'uniun Pro Flüela decida.
