Landarenca è oz ina fracziun da la vischnanca da Calanca. In vitget idillic che giascha sin in plaunet 300 meters sur la fracziun da Selma. Landarenca cuntanschan ins cun la «Teleferica Selma-Landarenca». E la pendiculara è existenziala per la fracziun che quinta actualmain 11 abitantas ed abitants. Quels dependan da la colliaziun cun la val per ir a lavurar, per far cumissiuns e per transportar material. La suletta alternativa è numnadamain ina via da sauma taissa ch'ins dovra radund 40 minutas. Era il sulet restaurant – la «Osteria Landarenca» – dependa da la pendiculara. Quai d'ina vart per il provediment cun material, da l'autra vart però era per che turists e viandantas vegnian a Landarenca.
Senza la pendiculara crai jau ch'il vitget muriss.
Latiers vegn il cumbat encunter la depopulaziun. Ils blers dals 11 abitants che vivan là sur onn èn u pensiunads, ubain datiers da la pensiun. Famiglias cun uffants na datti betg. L'anteriura chasa da scola è entant ina chasa da vacanzas e per camps – per exempel per excursiuns u battasendas.
La gronda automatisaziun avant 18 onns
Avant stgars 20 onns ha il chantun en il rom da lavurs da renovaziun era automatisà il manaschi da la pendiculara. Quai per servir meglier ils indigens che penduleschan per part a la lavur, e da l'autra vart era turistas e viandants che pon dapi lura nizzegiar la pendiculara durant 24 uras mintga di.
La pendiculara chantunala era pli bunmartgada
La pendiculara da Selma a Landarenca ha il chantun endrizzà il 1961 enstagl d'ina via da colliaziun. Ina tala via na devi betg, cunquai che Landarenca è accessibel mo sur ina via da sauma taissa, ubain sur bots, stortas e sendas da viandar. Uschia ch'il chantun è stà obligà tenor la lescha da vias chantunala da procurar per in access. E tenor l'Uffizi da construcziun bassa èsi era pli bunmartgà, perquai che da bajegiar e mantegnair ina via che maina da Selma (916 meters sur mar) a Landarenca (1'298 meters sur mar) fiss pli char.
Il chantun maina vinavant la pendiculara. Quai fa era part dal contract da fusiun.
E che Landarenca ha mantegnì il dretg d'avair in'access resulta era dal contract da fusiun, nua ch'il chantun è s'obligà da mantegnair la pendiculara. L'anteriura vischnanca da Landarenca ha numnadamain fusiunà cun Arvigo (1980) e pli tard (2015) cun Cauco, Selma e Braggio (ch'ha era ina pendiculara) a la vischnanca Calanca.