Teater Giuven Grischun - Cura che uffants stattan sin tribuna

Igl è glindesdi, ils 14 d'october, la damaun a las 10:13 uras, giuvens e giuvnas sesan en in rudè sin sutgas nairas e guardan en ina direcziun: tar Florian Lampert, reschissur e manader dal curs da teater. Igl è l'emprima damaun da quest'emna ed el beneventa tuts cordialmain.

Ils uffants paran fitg gnervus, quai tschessa dentant cun cumenzar a dar gieus. Ina sutga tranter els è vida, e las persunas sper la sutga vida ston clamar insatgi auter per sa metter sper els. La suletta regla: els na dastgan betg duvrar lur vusch. Las figuras che la gruppa fa cun lur corps daventan adina pli curiusas e legras.

La gronda part da la damaun passenta la gruppa cun gieus sumegliants, fin ch'il manader annunzia in nov exercizi: ina scena d'improvisaziun. Qua guardan ils uffants cun egls gronds – sin quai han els spetgà.

Quatter uffants sesan sin quatter sutgas, entant ch'ils auters guardan. Els giogan, ch'els sajan en in «auto», ed adina ina persuna gioga ina figura che fa insatge unic, e las trais autras copieschan ella. Alura midan els. L'incumbensa fa grond plaschair ad els. Era il manader Florian Lampert ha grond plaschair da la lavur cun ils uffants, era sch'i custia blera energia.

Blers uffants èn oz qua, perquai ch'els vulan ina giada daventar acturs o acturas. Auters na san insumma anc betg tge ch'els vulan daventar e giogan simplamain gugent teater. Quei che po era adina esser il motiv – suenter l'emprima damaun èn tut ils 13 uffants cuntents e giaudan lur gentar.