Corina Liechti e Brigitte Balzer ch'èn dapi l'entschatta dal 2022 manadras dal Teater Giuven Grischun han elavurà in program vast. Per exempel pon uffants tranter 9-12 onns s'annunziar per in project da teater che vegn lura preschentà en la Klibühni a Cuira. Als workshops ch'han lieu ina giada il mais a Cuira pon era creschids tranter 16-99 onns sa participar.
Purschidas per tudestg, talian e rumantsch
Impurtant saja era stà ch'i dettia purschidas en las differentas regiuns linguisticas, di la pedagoga da teater e saut Corina Liechti. Perquai pon giuvenils da Bellinzona, dal Mesauc e da la Val Calanca sa preschentar en il «Teatro Sociale a Bellinzona». Ils curs per uffants da scola ch'han lieu durant las vacanzas pon els frequentar a Cuira, dentant era a Lavin e Samedan en l'Engiadina.
Sper in project da teater che cuzza otg mais datti era projects pli curts.
Per l'ina perquai che blers na vulan betg s'obligar per in pli lung temp e per l'autra perquai che nus avain s’accurschì che las persunas èn gia uschiglio fitg occupadas.
In tema principal
Insatge han tut ils projects tuttina: Els sa fatschentan d'in tema, numnadamain «gust». Dumondas che duain vegnir tematisadas èn quel connex èn «Daco chattain nus intginas chaussas bellas ed autras betg?» «Tge nutriment gusta nus e tgenin betg?» «Daco avain nus differents gusts?» ubain «Tge amas ti e tge betg?»
Ils projects da teater tematiseschan il da mangiar, la musica, la moda, l'estetica u las rollas da gender. Co ch'ils participants e las participantas realiseschan la finala il toc, gliez è dentant liber.