Philipp Wilhelm ha 35 onns e blera experientscha politica. Dapi il 2012 politisescha il socialdemocrat a Tavau, l'emprim en il cussegl communal, dapi il 2021 sco landamma. En pli ha el presidià la Partida socialdemocratica grischuna, quai dal 2016 fin il 2020. E dapi il 2018 sesa Wilhelm er en il Cussegl grond. Giovanni Croce ha 44 onns e n'è politicamain betg enconuschent. El è gastronom e maina dapi 12 onns ina pizzaria a Tavau. Tenor l'um ch'ha tschintg uffants e che deriva oriundamain dal Tessin èsi però in avantatg da betg avair gronda experientscha politica, quai ha el declerà envers il schurnal regiunal da SRF.
Sco independent n'èn ins betg sut squitsch d'ina partida.
Philipp Wilhelm, il president communal en uffizi, vul far puncts tar la populaziun cun accentuar tge ch'el ha cuntanschì en sia emprima perioda d'uffizi. Tranter auter haja Tavau sviluppà en quest temp la purschida da temp liber, sport e cultura, generà plazzas en la scienza sco er dapli spazi per la mastergnanza. Er che la cumpatibilitad da professiun e da famiglia vegnia meglierada entras ina canorta supplementara, accentuescha il landamma en uffizi.
Ils ultims 100 onns è il post dal landamma adina stà en mauns dals burgais. Sco socialdemocrat haja el però adina pudì mantegnair sias valurs e mai stuì sa storscher, di Wilhelm.
Nus empruvain da preparar las fatschentas uschia che quellas porschan la meglra schliaziun per Tavau – e betg per ina singula partida.
Las opiniuns van dapart
Betg perina èn ils dus candidats davart la situaziun finanziala da Tavau. Tenor Philipp Wilhelm ha la vischnanca ina buna situaziun finanziala. Considerond las investiziuns che spetgian, stoppia quai però er esser uschia, di il president actual. Tenor Giovanni Croce n'haja la vischnanca betg pli sut controlla las finanzas. Ins na possia betg investir ed investir dapertut, insacura saja la cassa vida. Gest en il sectur social vegnia dà or il mument daners betg necessaris, menziuna Giovanni Croce.
Er quai che pertutga la politica da traffic han ils dus candidats differentas ideas. Per dar dumogn al traffic patratga Giovanni Croce vi d'ina chasa da parcar dasper il lai. Dal plan da spustar la staziun da tren, na tegna el nagut. En pli è el da l'avis ch'ins stoppia schliar la problematica pass per pass. Da l'avis cuntrari è il landamma actual, Philipp Wilhelm. El accentuescha ch'i dovria ina situaziun cumplessiva e vasta.
