Svilup regiunal - Ina dieta per la lavur dal svilup regiunal

A Claustra ha gi lieu per la terza giada ina dieta per sviluppaders e sviluppadras regiunalas. Durant quella èn vegnids preschentads differents projects or da differentas regiuns. Ina da quels è l’idea da cumbatter la mancanza dad abitaziuns pajabels per indigens cun uschenumnads «Tiny Houses», pitschnas chasas da maximalmain 50 meters quadrats ch'èn simplas dad installar. Quellas na dovran numnadamain nagin fundament. L’idea ch’è vegnida preschentada è actualmain en ina fasa fitg tempriva.

Ma er in project ch'è gia en funcziun ha chattà sia via a Claustra. Il project cun nom «Volksmusighus St. Antönien» vul mussar, sco ch'ins pudess reutilisar veglias chasas da scola che na vegnan betg pli duvradas.  

Impressiuns da la dieta

La tschertga ed il sustegn d’ideas da la glieud

Sco persuna privata èsi particularmain grev da s'imaginar tals projects u ideas. Spezialmain grev èsi da chattar or, sco ch’ins reussescha a finanziar las ideas. La Confederaziun ed er il chantun Grischun mettan a disposiziun differentas mesiras da promoziun per apunt gidar a questas ideas da partir. Qua èn ils differents sviluppaders e sviluppadras regiunalas l'emprima adressa per agid.

Ina incumbensa principala dal svilup regiunal è da chattar e gidar projects che portan ina plivalur culturala e finanziala en la regiun. «Mia porta da biro è adina averta per bunas ideas u projects en e per la regiun», uschia la sviluppadra regiunala da la Surselva, Céline Meury.