Susanne Lebrument, igl è vegnì enconuschent l'emna passada che Reto Furter, co-manader da la famiglia da medias tar la Somedia, e Philipp Wyss, schefredactur da la Südostschweiz online e da la Bündner Zeitung, dattan giu lur posts. Daco?
Susanne Lebrument: Ins sto forsa differenziar, damai ch'igl è stà tar Philipp Wyss uschia ch'el ha gia dapi in temp gì l'idea ch'el less puspè scriver dapli, ed era esser enavos en la redacziun. E nus avain lura pudì correspunder a quest giavisch. Tar Reto Furter èsi stà uschia ch'ins ha discurrì fitg intensiv, era davart la strategia, ed ha alura simplamain badà che sias ideas e las imaginaziuns da la Somedia na van betg pli ensemen. Perquai avain nus decis d'ir in ord l'auter. Perquai èn quai duas differentas chaussas.
A Reto Furter han ins pia disdì la plazza?
Na, ins è lura propi sa decidì [d'ir ord l'auter]. Damai che tuts dus han ditg che quai na fetschia betg pli senn, perquai che sias ideas e las ideas da la Somedia n'èn betg stadas pli las medemas. Ins ha lura ponderà, sch'i dettia forsa anc pussaivladads internas. Quai è stà il motiv.
Susanne Lebrument (1972) è vicepresidenta e delegada dal cussegl administrativ da la Somedia.
Il manader da la famiglia da medias daventa ussa Joachim Braun. El è dapi l'onn passà en l'interpresa e vegn da la Germania, da la «Ostfriesenzeitung». La nova schefredactura daventa Nikola Nording, era ella vegn da la «Ostfriesenzeitung». Na dovri betg persunas che han gia blers onns experientscha en il Grischun?
Gea, quai dovri segir, ma i dovra in team divers. I dovra in team divers dad umens e da dunnas. Quai ha Nicoletta Cimmino gia ditg l'onn 2019 che nossa societad è gea extrem differenta ed i dat bunamain dapli persunas cun ina derivanza da migraziun che senza, ed en las redacziuns na sa mussa quai dentant anc betg, sche jau dastg dir quai uschia. E da l'autra vart duvrain nus era glieud a la testa, che ha ina gronda savida da la transfurmaziun digitala e che po era promover quella en in aut tempo.
Avais vus tschertgà sapientivamain insatgi extern?
Gea e na. Igl è stà plitost ina casualitad, tant Joachim Braun sco era Nikola Nording èn stads plitost ina casualitad. Lura ston ins era vesair che las chasas edituras u la branscha da medias en Germania stat pli ferm sut squitsch da questa transfurmaziun digitala. Pia sche ti guardas gasettas u sche ti guardas chasas da medias, na vesas ti praticamain naginas reclamas pli da l'industria d'autos u praticamain naginas reclamas per uras. Las medias tudestgas èn gia pli lunsch en quest process ed era pli lunsch en questa transfurmaziun digitala. Gea, quai pon ins dir, forsa han els era gia dapli experientscha che blers Svizzers.
Vus avais menziunà la transfurmaziun digitala. È quai stà l'argument principal per Nikola Nording, u co ha ella uschiglio anc pudì persvader per il post da schefredactura?
Jau persunalmain hai sa chapescha plaschair che nus avain ina dunna giuvna en la schefredacziun. Quai n'ha gea betg dà ina gronda discussiun avant, cura che Martina Fehr è ida. Ed ella ha ina grond'experientscha. Ella ha era lavurà ditg ensemen cun Joachim Braun. Gea, nus avain qua il sentiment, qua datti anc ina giada dapli u anc ina giada in tempo pli aut.
Igl è cler, i va direcziun transfurmaziun digitala. È quai la mira principala per las duas novas persunas. Da manar la Somedia en questa direcziun?
Absolut, damai ch'ins sto simplamain vesair che «content first» u «digital first», che nus vulain vairamain realisar rapports focussai sin il lectur u la lectura, saja quai uss en il print, saja quai en in e-paper, quai è segir. Quai è segir noss emprim interess, ma nus vulain era cumpensar la reducziun dals abunaments da print cun abunaments digitals e cun abunaments dad e-paper e qua dovri simplamain la savida correspundenta.
