L'idea per in servetsch da mediaziun saja vegnida da la redacziun da la chasa da medias «Somedia», declera Susanne Lebrument. Ad els saja impurtant ch'il public survegnia ina plattafurma, nua ch'el possia plazzar resuns - saja quai positivs sco era negativs. Betg per tuttas e tuts è quai ina buna schliaziun.
Roger Blum: Independenza betg segirada
Roger Blum è professer per scienza da medias pensiunà. Pli baud era el mediatur da medias tar la SSR ed accentuescha, quant impurtant che l'independenza d'in mediatur public u d'ina mediatura publica saja. Tar Susanne Lebrument, ch'è cumpossessura da la Somedia e vicepresidenta dal cussegl administrativ, na saja l'independenza betg garantida, manegia Roger Blum.
Sche l'independenza da la mediatura publica n'è betg visibla, perda ella la credibladad envers il public.
Sin la dumonda da la neutralitad manegia Susanne Lebrument che la pussanza saja la fin finala tar il public. Sch'ils lecturs e las lecturas sajan da l'opiniun ch'ella na saja betg neutrala, na vegnian els era betg ad utilisar la purschida. Però ha Sussane Lebrument gia gì resuns.
Jau hai gia survegnì blera resonanza dal public. Ils resuns èn fitg divers. Da problems da distribuziun da la gasetta, sur laud e critica.
Davart las decisiuns dal post da mediaziun e davart las tematicas ch'occupan, vegnia infurmà en ina columna, hai gì num.
