Rars èn stads ils muments ch'ins ha pudì far quest'entschatta da la stad activitads giuadora en il sitg. Durant la stad datti la pussaivladad d'ir tscherts dis la damaun a far yoga ubain pilates en il liber. Ed ina damaun da bell'aura han set dunnas exact fatg quai cun la scolasta da yoga, Tara Meier, ch'abitescha a Cumbel.
Far yoga en il liber ha plaschì a las participantas. I saja insatge spezial da far quai cun il chant d'utschels, manegian pliras levamarveglas. Tranter ils bels suns da la natira han maschinas da segar ed aviuns da cumbat fatg da temps en temps in zic canera. Ma yoga saja era quai: chattar il ruaus entaifer la canera, di Tara Meier durant ils exercizis.
Suenter in'ura yoga en la sumbriva d'ina papla èn las dunnas tut schluccadas e cuntentas.
Jau fatsch bler yoga, ma esser giuador cun autras ensemen è insatge spezial.
Tschertas han suenter da turnar al lavurdi, tschellas giaudan anc in café en il bistro dal bogn avert.
